தமிழர் தலைவருக்கு – தமிழ்நாடு அரசின் “தகைசால் தமிழர்” விருது !

2023 கட்டுரைகள் செப்டம்பர் 1-15,2023

உண்மை Unmai

சென்னைத் தலைமைச் செயலகக் கோட்டை முகப்பில் மாண்புமிகு முதலமைச்சர் தேசியக் கொடியை 15.8.2023 காலை 9 மணிக்கு ஏற்றினார். அதன்பின் நடைபெற்ற விருது வழங்கும் நிகழ்வில் முதலாவதாக – திராவிடர் கழகத் தலைவர், தமிழர் தலைவர் ஆசிரியர் மானமிகு கி.வீரமணி அவர்களுக்கு “தகைசால் தமிழர் விருதும் ரூபாய் 10 லட்சத்துக்கான காசோலையையும் தமிழக முதல்வர் வழங்கிச் சிறப்பித்தார்.

“தகைசால் தமிழர் விருது” வழங்கப்பட்ட திராவிடர் கழகத் தலைவர் பற்றி தமிழ்நாடு அரசு வெளியிட்டுள்ள அதிகாரப்பூர்வமான – சிறப்பான குறிப்பில்,

“முனைவர் கி.வீரமணி அவர்கள் கடலூர் மாவட்டம் பழைய பட்டினத்தில் வாழ்ந்த சி.எஸ்.கிருஷ்ணசாமி-மீனாட்சி இணையருக்கு டிசம்பர் 2, 1933 அன்று மூன்றாவது மகனாகப் பிறந்தவர். இவரது இயற்பெயர் சாரங்கபாணி ஆகும். 12 வயதில் காரைக்குடியில் நடைபெற்ற இராமநாதபுர மாவட்ட முதலாவது திராவிடர் கழக மாநாட்டில் உரையாற்றினார். இளம் வயதிலேயே பொது வாழ்க்கையில் ஈடுபட்டு. “சமூகப் பாகுபாட்டுக்கு ஆளான மக்களுக்கு” ஆதரவாக தந்தை பெரியார் நடத்திய சமூகப் பிரச்சாரங்கள் மற்றும் போராட்டங்களில் தீவிரமாக ஈடுபட்டு நாற்பது முறை சிறைவாசம் அனுபவித்தவர். 1962 இல் ‘விடுதலை’ நாளிதழ் ஆசிரியராகப் பொறுப்பேற்று. தொடர்ந்து 60 ஆண்டுகளையும் கடந்து மிகச் சிறப்பாகப் பணி செய்து வருபவர். மேலும், உண்மை, பெரியார் பிஞ்சு.  The Modern Rationalist- (ஆங்கிலம்) இதழ்களுக்கு ஆசிரியராகவும் இணைய தளங்கள் வாயிலாக மேற்கண்ட கருத்துகளைப் பரப்பி பன்னாட்டுத் தமிழர்களையும் ஒருங்கிணைத்து பெரியாரின் பணியைத் தொடர்ந்து வருபவர். தமிழ்நாட்டிற்கும் தமிழினத்தின் வளர்ச்சிக்கும் பெரும் பங்காற்றிய தமிழரும், திராவிடர் கழகத் தலைவருமான முனைவர் கி.வீரமணி அவர்களுக்கு 2023ஆம் ஆண்டிற்கான “தகைசால் தமிழர் விருது’’ தமிழ்நாடு அரசு வழங்கிச் சிறப்பிக்கிறது’’ என்று கூறப்பட்டுள்ளது.

முதல்வரின் வாழ்த்து

‘‘தமிழ்நாடு அரசின் தகைசால் தமிழர் விருது பெற்றுள்ள மானமிகு ஆசிரியர் கி.வீரமணி அவர்களை வாழ்த்துகிறேன், வணங்குகிறேன்.
பத்து வயதில் பகுத்தறிவு மேடையேறி எண்பது ஆண்டுகளாக இன எழுச்சிப் போர்முரசம் கொட்டி வரும் சுயமரியாதைச் சுடரொளி அவர்!

இனம், – மொழி, – நாடு மூன்றும் மூச்சென எந்நாளும் ஓய்வறியாமல் உழைத்துவரும் அவருக்கு, கலைஞர் 100இல் இந்த விருது வழங்குவதைத் தமிழ்நாடு அரசு பெருமையாய்க் கருதுகிறது. திராவிட இயக்கத்தின் நூற்றாண்டு அடையாளமாய் விளங்கும் மானமிகு ஆசிரியரின் தொண்டுத் தொய்வின்றித் தொடரட்டும்!’’
-இவ்வாறு அப்பதிவில் முதலமைச்சர் குறிப்பிட்டுள்ளார்.

தமிழர் தலைவர் பேட்டி

விருது பெற்ற தமிழர் தலைவர் ஆசிரியர் அவர்கள் செய்தியாளர்களுக்கு அளித்த பேட்டியில்,
”தகைசால் தமிழர் விருது” என்ற இந்த விருது என் பெயருக்கு அளிக்கப்பட்டு இருந்தாலும், உண்மையில் இவ்விருது தந்தை பெரியாருக்கு அளிக்கப்பட்ட விருது.
பெரியாருடைய இயக்கம் ஒரு தொடர் லட்சியப் பயணத்தைச் செய்து எதிர்நீச்சல் அடித்துக் கொண்டிருக்கும்பொழுது, அதற்கு உறுதுணையாக இருக்கக் கூடிய எண்ணற்ற மறைந்தும் மறையாமல் நம் நெஞ்சங்களில் நிறைந்து இருக்கக் கூடிய, வாழுகின்ற அத்துணைத் தொண்டர்களுக்கும், தோழர்களுக்கும் உரியது. தமிழ்நாடு அரசு -”திராவிட மாடல்” அரசு இங்கே சிறப்பாக வழங்கிய தகைசால் தமிழர் விருது என்பது தனிப்பட்ட வீரமணி என்ற ஒரு நபருக்குக் கொடுக்கப்பட்டதாக நான் கருதவில்லை. இதை அடக்கத்தோடு நான் பதிவு செய்ய விரும்புகிறேன். அதுமட்டுமல்லாமல், இந்த விருதைப் பெறுகின்ற நேரத்தில், இரண்டு செய்திகள் மிக முக்கியமானதாகும்.

45 ஆண்டுகளுக்கு முன்பு நம்முடைய முதலமைச்சர் அவர்கள் தாக்கப்பட்டு, நெருக்கடி நிலை காலத்தில், அந்தச் சிறைச்சாலைக் கொட்டடியில் தள்ளப்பட்டபொழுது, அவரது உடலில் ரத்தம் வழிகின்ற நிலையில், அவரை அணைத்துப் பிடித்த கைக்குத்தான் – அந்தக் கை இன்றைக்கு விருது கொடுத்திருக்கிறது என்பதை நினைக்கும்பொழுது, மிகுந்த உணர்ச்சிப்பூர்வமான சூழல் ஏற்பட்டது.

என்றாலும், ஒரு செய்தி மிகவும் முக்கியமானது; இவ்விருது பெரியாருக்குக் கொடுக்கப்பட்ட விருது; பெரியார் தொண்டர்களுக்குக் கொடுக்கப்பட்ட விருது என்ற பெருமைகள் இருந்தாலும், இவ்விருதைக் கொடுத்தவர் சமூகநீதிக்கான சரித்திர நாயகர் ஒப்பற்ற முதலமைச்சர் ‘திராவிட மாடல்’ ஆட்சியைக் கட்டிக் காத்துக் கொண்டிருக்கின்றவர். அந்த வகையிலும் சரி, இவ்விருது கொடுக்கப்பட்ட காலம் எனக்கு மிக்க மகிழ்ச்சியைத் தரக்கூடிய காலம்; அது என்னவென்றால், முத்தமிழறிஞர் கலைஞர் அவர்களின் நூற்றாண்டு விழாவைக் கொண்டாடிக் கொண்டிருக்கின்ற காலகட்டத்தில், இவ்விருது அளிக்கப்பட்டு இருக்கிறது.
“களப்பணி செய்யும் கடமையை எனது மூச்சாக, பேச்சாக, எழுத்தாகக் கொண்டு நாட்டில் மனித சமத்துவமும், சமூகநீதியும் பேணப்படவும், மறுக்கப்படும் மனித உரிமை மீட்டெடுப்புக்கும், ‘அனைவருக்கும் அனைத்தும்‘ கிட்டும் சமத்துவ, சம வாய்ப்புச் சமூகத்தினை உருவாக்கும் பணியிலும் ஈடுபடுவேன். அந்தப் பணிக்காக எந்த விலையும் தர, என்றும் ஆயத்தமான உறுதியுடன் உள்ளவனாக உழைப்பேன்’’

தேசியக் கொடியேற்றும் அந்த உரிமையை, தமிழ்நாட்டிற்கு மட்டுமல்ல, இந்தியாவில் உள்ள எல்லா மாநில முதலமைச்சர்-களுக்கும் கலைஞர் பெற்றுத் தந்திருக்கிறார். இன்றைக்கு நம்முடைய முதலமைச்சர் அந்தக் கொடி ஏற்றிய காட்சியைப் பார்த்தபொழுது எனக்கு மகிழ்ச்சியாக இருந்தது.

மாநில சுயாட்சியினுடைய முதல் கட்ட வெற்றி என்ற முறையில் அதைப் பார்க்கிறோம்.
தகைசால் தமிழர் விருது பெரியாருக்கு உரியது எனற காரணத்தினால், இவ்விருதுக்கு அளிக்கப்பட்ட 10 லட்சம் ரூபாயை – சிறுகனூரில் அமைக்கப்படும்- பெரியார் உலகத்திற்கு நான் இதை நன்கொடையாக அளிக்கிறேன்.

தமிழ்நாடு அரசு சார்பில் 15.8.2023 அன்று கொண்டாடப்பட்ட விடுதலை நாள் விழாவில் ‘திராவிட மாடல்’ அரசின் ஒப்பற்ற முதலமைச்சர் –
சமூகநீதிக்கான சரித்திர நாயகர் மாண்புமிகு மானமிகு மு.க.ஸ்டாலின் அவர்கள் தமிழ்நாடு அரசின் இவ்வாண்டுக்குரிய ‘தகைசால் தமிழர்’ விருதினை எனக்கு அளித்துப் பெருமைப்படுத்தியுள்ளமைக்கு. எனது உளப்பூர்வமான, தலைதாழ்ந்த வணக்கம், நன்றி!

கவிப்பேரரசு வைரமுத்து வாழ்த்து!
தொடர் ஓட்டம்
துடிக்கும் இதயம்
அடர் கொள்கை
அடங்கா வீரம்
சுடர் மொழி
சூறாவளி
வாழ்வை மீறிய சாதனை
வயதை மீறிய இளமை
திராவிட இயக்க
உயிர் நூலகம்
ஆசிரியர் கி.வீரமணி
அந்தத்
தகைசால் தமிழரை
வணங்கி வாழ்த்துகிறேன்
மூத்தத் தலைவர்கள் சந்திப்பு

தமிழ்நாடு அரசின் ‘‘தகைசால் தமிழர்’’ விருது திராவிடர் கழகத் தலைவர் கி.வீரமணி அவர்களுக்கு அறிவிக்கப்பட்டதையொட்டி இந்திய கம்யூனிஸ்ட் கட்சியின் மூத்தத் தலைவர் ஆர்.நல்லகண்ணு அவர்களது இல்லத்திற்குத் தமிழர் தலைவர் ஆசிரியர் நேரில் சென்று பயனாடை அணிவித்து இயக்க நூல்களை வழங்கினார் (சென்னை, 14.8.2023)

அதேபோல், மார்க்சிஸ்ட் கம்யூனிஸ்ட் கட்சியின் மூத்த தலைவர் தோழர் சங்கரய்யா அவர்களது இல்லத்திற்குத் தமிழர் தலைவர் ஆசிரியர் நேரில் சென்று பயனாடை அணிவித்து இயக்க நூல்களை வழங்கினார்.

இருநிலையாளர்களுக்கும்
எமது நன்றி!

பாராட்டுகள் நம்மை தலைகவிழச் செய்கின்றன! எதிர்ப்புகள் தலையை நிமிர்த்துகின்றன! எனவே, இருநிலையாளர்களுக்கும் எமது நன்றி!
பயணங்கள் முடிவதில்லை!
லட்சியங்கள் தோற்பதில்லை!!
என்று தமது உள்ளத்து உணர்வுகளை வெளியிட்டார். ♦

ஆதித்த கரிகாலனை கொன்றது யார் தொல்லாய்வு குறிப்பு

தொல்லாய்வு

2023 ஆகஸ்ட் 16-31,2023 உண்மை Unmai

அறிய வேண்டிய
அரிய தொல்லியல் குறிப்புகள்
புலவர் செ. இராசு, எம்.ஏ., பிஎச்.டி..,

“ஆதித்த கரிகாலனைக் கொன்றவர்கள் மூன்று கொலைகார பார்ப்பன சகோதரர்கள்’’. இது வரலாற்று உண்மை. இதை தற்கொலை என்று கூறி மறைக்க நடக்கும் சதி.சுந்தரசோழன்  வானவன் மாதேவியின் மூத்த மகன் ஆதித்த கரிகாலன். இளவரசு பட்டம் சூட்டப்பட்டு தந்தையின் சார்பில் ஆட்சி புரிந்தவன். தன் பெயரிலேயே கல்வெட்டு பொறிக்கும் உரிமை பெற்றவன். அவன் கொல்லப்பட்டான். கொலை செய்தவர்கள் மூன்று பார்ப்பன சகோதரர்கள் அவர்கள்,
சோமன் (பிற்பகுதி அழிக்கப்பட்டுள்ளது, இவன் தம்பி ரவிதாசனான பஞ்சவன் பிரமாதிராசன், இவன் தம்பி பரமேஸ்வரனான இருமுடி சோழ பிரமாதிராசன் ஆகியோர்.

இது கடலூர் மாவட்டம் சிதம்பரம் வட்டம் உடையார்குடி காட்டுமன்னார்குடி அனந்தேசுரர் கோயில் கருவறை மேற்குச் சுவரில் பொறிக்கப்பட்ட இராசராசனின் இரண்டாம் ஆண்டுக் கல்வெட்டில் தெரியவரும் செய்தியாகும். (கி.பி.987).

இக்கல்வெட்டில் இராசராசன் கூற்றாகவே “கரிகால சோழனைக் கொன்ற துரோகிகள்’’ என்ற தொடர் இடம் பெற்றுள்ளது.
இக்கல்வெட்டை மத்திய அரசு தொல்லியல் துறை கல்வெட்டுப் பிரிவினர் 1920 ஆம் ஆண்டு படியெடுத்துள்ளனர். (ARE 577 OF 1920) தென்னிந்திய கல்வெட்டுத் தொகுதி 32இல் 230ஆம் கல்வெட்டாய்ப் பதிப்பித்துள்ளனர். (பக்கம் 369, 370) எபிகிராபியா இதழ்

21இல் 168-170 பக்கங்களில் இது பற்றிய விரிவான கட்டுரை வெளிவந்துள்ளது. இவை அனைத்தும் ஆதித்த கரிகாலனைக் கொன்றவர்கள்
மேற்காட்டப்பட்ட மூன்று பார்ப்பனச் சகோதரர்களே என்று மிகத் தெளிவாகக் கூறுகிறது. இவை கூறும் ஆங்கில வாசகம்,
According to that soman, his younger brothers, Ravidasan alias Panchavan Bramadhirajan and his younger brother Paramesvaran alias Irumudich Cholabramadhirajan had been found guilty of treason as they murdered Karikala chola, whom took the head of Pandya.

சொத்துக்கள் பறிமுதல்

உடையார்குடிக் கல்வெட்டு இராசராசன் “வடகரை பிரமதேயம் வீரநாராயணச் சதுர்வேதிமங்கலப் பெருங்குறிப் பெருமக்களுக்கு எழுதிய ஓலை (ஸ்ரீமுகம்) ஆகும். கொலைகாரச் சகோதரர்கள் இவர்கள் தம்பிமார், இவர்கள் மக்கள், இவர்கள் மனைவிமார், சித்தப்பா, பெரியப்பா, இவர்கள் மக்கள், பிள்ளை கொடுத்த மாமன், தாயோடு உடன்பிறந்த மாமன், இவர்கட்குப் பெண் கொடுத்தோர். இவர்கள் பெண்களை மணம் செய்தோர் ஆக அனைவர் நிலமும் பறிமுதல் செய்யப்பட்டது. இப்போது உடன்பிறந்த மலையனூரனான தேவதாசக்கிரமவித்தன், இவர்கள் மக்கள், தாய் பெரிய நங்கைச்சானி ஆகியோர் நிலம் பறிமுதல் செய்யக் கூறுகிறது.’’
கொலைகாரப் பார்ப்பனச் சகோதரர்கள் மூவரும் உத்தம சோழன் ஆட்சிக் காலத்தில் தண்டிக்கப்படவில்லை. சேர நாட்டிற்குத் தப்பிச்சென்ற அவர்கட்குக் காந்தளூர்ச் சாலை அடைக்கலம் கொடுத்தது.

பட்டம் ஏற்றதும் ஒற்றர் மூலம் செய்தி அறிந்த இராசராசன் படையுடன் சென்று காந்தளூர்ச் சாலையை அழித்துக் கொலைகாரர் மூவரையும் கொன்றான் என்று ஆய்வாளர் கணியன் பாலன், நடன காசிநாதன் ஆகியோர் கூறுகின்றனர். செங்கம் பகுதி நடுகல் “சாலை கல்மறுத்து அங்குள்ள மலை ஆளர் தலை அறுத்து’’ என்று கூறுகிறது. இதனால்தான் இராசராசன் மெய்க்கீர்த்தியில் முதல் வெற்றியாகக் காந்தளூர்ச் சாலை கலமறுத்தது கூறப்படுகிறது.
இதற்கான கல்வெட்டுச் சான்றுகள்: நெ.230 & நெ.67

ஆசிரியர் கி.வீரமணி தலைவரானது எவ்வாறு?

அய்யாவின் அடிச்சுவட்டில்… இயக்க வரலாறான தன் வரலாறு (318)

2023 அய்யாவின் அடிச்சுவட்டில் ஜூலை 1-15, 2023

July 9, 2023உண்மை Unmai

(கட்டுரையின் ஒரு பகுதி)

தலைமைப் பொறுப்பை ஏற்கச் செய்த தோழர்களின் பாசம்!
– கி. வீரமணி

திராவிடர் கழகத் தலைமைச் செயற்குழுக் கூட்டம் சென்னை பெரியார் திடலில் 17.11.2003 அன்று திங்கள் காலை 10 மணிக்கு எமது தலைமையில் நடைபெற்றது.
8.11.2003 சனியன்று திருச்சியில் நடைபெற்ற திராவிடர் கழகப் பொதுக்குழுக் கூட்டத்தில் நிறைவேற்றப்பட்ட தீர்மானங்களில் ஒன்றைத் தவிர மற்றத் தீர்மானங்களை திராவிடர் கழகத் தலைமைச் செயற்குழுக் கூட்டத்தில் வரவேற்று, கழக அமைப்பில் செய்யப்பட்ட மாறுதல்களையும் ஒருமனதாக ஏற்றுச் செயல்படுவது எனவும் தீர்மானிக்கப்பட்டது.

திராவிடர் கழக பொதுக்குழுக் கூட்டத்திற்கு ஆசிரியரை வரவேற்று அழைத்துச் செல்லும் தோழர்கள்.

அந்த ஒரு தீர்மானம் என்ன?

இளைஞர்களைத் தலைமைப் பொறுப்புக்குப் பயிற்சி அளிக்கும் உயரிய நோக்கில் பொதுச்செயலாளர் பொறுப்பினை நான் மாற்றி அறிவித்ததுதான்!
அறிவிப்புச்செய்த அடுத்த நொடியே, நமது கழகக் குடும்பத்தவர்களில் மிகப் பலர் கண்ணீரும், கம்பலையுமாக அழுதும், கூச்சலிட்டும் இல்லை, இல்லை நீங்கள்தான் தொடரவேண்டும்¢ நீங்கள் சொல்லும் எல்லா ஆணைகளையும் ஏற்றுக்கொள்ளும் எங்களால் இதை மட்டும் ஏற்க எங்கள் மனம் ஒப்பவில்லை. உங்கள் காலத்தில் நீங்கள்தான் பொதுச் செயலாளராகத் தொடர வேண்டும்’ என்று வற்புறுத்திய வண்ணம் (சுமார் 1 மணிநேரத்திற்குமேல்) இந்தக் காட்சி தொடர்ந்தது.

கழகக் குடும்பங்களின் பாசம் என்னை நெகிழ வைத்தது!

உள்ளத்தில் ஊறிய உணர்ச்சிகளை வார்த்தைகளால் வெளிப்படுத்த இயலாது! பெரிதாக நாம் என்ன செய்துவிட்டோம்; இவ்வளவு பாசத்தைக் கொட்டும் நம் கழகக் குடும்பங்களின் நம்பிக்கையை நாம் எவ்வளவு பெரிய வைப்பு நிதியாகப் பெற்றுள்ளோம், என்று எண்ணி எண்ணி உணர்வு அலைகள் என்னுள்ளத்தில் மோதின.

அவர்கள் அன்புக்கு நான் என்றும் ஓர் அடிமைதான்!

தந்தை பெரியார் பணி முடிக்க எள்ளளவும் சபலங்களுக்கும் ஆளாகாது, பழி சுமந்தாலும், பணி முடிப்பதே நம் லட்சியம் என்று உயிரையும், மானத்தையும் (இரண்டையும் முக்கியமாகக் கருதும் சராசரி மனிதர்களைத் தாண்டி) இழக்கவும் தயாரான நிலையில் உள்ள வாழும் ஒரு பெரியார் தொண்டன்தானே நான். வேறு என்ன சிறப்புத் தகுதிகள் எனக்கு உண்டு?

எனது உடல்நிலை மிக நன்றாக உள்ளது உள்ளமும் நாளும் பக்குவப்பட்ட உறுதி மலையாய் வளருகிறது. உழைக்கும் ஆர்வமோ குன்றாதிருக்கிறது. இயக்கமும் சிறந்த கட்டுப்பாட்டுடன் இயங்குகிறது. இந்த நிலையில்தான் உங்களுக்குப் பிறகு – யார்?’ என்ற வழமையான ஒரு பொதுக் கேள்விக்கான விடையுடன் என் பணியைத் தொடரவும், ஏராளமான இளைஞர்கள் கூட்டு மனப்பான்மையுடன், கருத்திணக்கத்தின் அடிப்படையில் செயலாற்றத் தயாராகி இதோ பயிற்சிக் களத்தில் இறக்கிவிடப்பட்டுள்ளனர் என்று காட்டுவதற்காகத்தான், இந்த புதிய அறிவிப்பினைச் செய்து _ புதிய மாற்றத்தினை  புதிய ஏற்பாட்டைச் செய்தோம்.
நான் செய்தியாளர்களிடம் 8.11.2003 அன்று மாலை திருச்சியில் அளித்த அதே விளக்கத்தினை இவர்களுக்கும் என்னால் முடிந்த அளவுக்குச் சொன்னேன். நாள் முழுவதும் இதிலேயே ஓடிக்கொண்டிருந்தது!

வெளிநாடுகள், உள்நாட்டுத் தொலைபேசி அழைப்புகள் இதே பாணியில் எனக்கு வந்த வண்ணம் இருந்தன.

அங்கிருந்த உணர்வுபூர்வமான, நெகிழ்வான, பாசச் சூழலில் விரிவான விளக்கம் அளிக்க இயலாத நிலையில் 10.11.2003 ‘விடுதலை’யில்,
“இந்தப் புதிய ஏற்பாடு என்பது எந்த வகையிலும் நான் ஒதுங்கிக்கொள்ளவோ, தனிமைப்படுத்திக் கொள்ளவோ அல்லது ஓய்வு எடுத்துக் கொள்ளவோ செய்யப்பட்டதல்ல!

என் மூச்சு அடங்கும்வரை என்னுடைய இயக்கப் பணிகளை, தந்தை பெரியார் கொள்கைகளை அகிலம் முழுவதிலும் கொண்டு செல்லுவதுதான் என் பணி; என்னை அதிலிருந்து மாற்றிட, நிறுத்திட எவராலும் முடியுமா?

இளைஞர்களை நாம் வாழும்போதே பொறுப்புகளில் அமர்த்தி, நாமும் உடன் பணி செய்து, கூட்டுப் பணியைத் தொடங்கி நடத்திவிட்டால், நம் இயக்கம் இதன்மூலம் மேலும் பலமாகும் என்பதால்தான் இதைச் செய்துள்ளோம்.
தலைமைப் பொறுப்பில் உள்ளவர்கள், வாழும் காலத்திலேயே, இப்படி இரண்டாவது தலைமுறையை உருவாக்கி இயக்கத்தவர்களுக்கும், நாட்டிற்கும் அவர்களை அறிமுகப்படுத்திட, இது ஒரு பயிற்சிப் பட்டறை போன்றதே! சிங்கப்பூர் நாட்டின் லீ குவான் யூ, போல் அண்மைக்கால உதாரண மாமனிதர்கள் பொது வாழ்வில் உண்டு.

நிருவாகத் திறமை பெற புதியவர்களுக்கு வாய்ப்புத் தருவதற்கான இந்த ஏற்பாடுபற்றி நான் கடந்த ஓராண்டுக்கு மேலாகச் சிந்தித்து வந்தேன்.
இதுபற்றி நான் மற்றவர்களிடம் கலக்கவில்லை என்பது உண்மை. ஏன் நான் பொதுச்செயலாளராக துரை. சக்கரவர்த்தியை அறிவிக்கும் நிமிடம்வரை அவர்களுக்கே கூடத் தெரியாது. அதற்காக தோழர்கள் என்னை மன்னிக்க வேண்டும்.

தலைவராகத் தேர்வானமைக்கு வாழ்த்து

தலைமை என்பது நம் இயக்கத்தில் ‘பதவி நாற்காலி’ அல்ல; பொறுப்புகளைச் சுமக்கும் சுமைதாங்கி. ‘பழி’யேற்கத் தயாராக இருக்கும் பொறுப்புதான் இது! மாறாகஅலங்காரம் – அதிகாரம் கொண்ட அணிமணியல்ல!

இளைஞர்கள் ஏராளமாக இயக்கத்தினை நோக்கி வருகின்றார்களே அது மகிழ்ச்சிக்குரியதுதான். ஆனால், பக்குவப்படுத்தப்பட்ட, நம் உலையில் அவர்கள் பழுக்கக் காய்ச்சப்பட்டு பதப்படுத்தப்பட வேண்டாமா? அந்த எண்ணத்தினால் விளைந்ததே இந்த ஏற்பாடு’’ என்று அறிக்கையின் வாயிலாகத் தெரிவித்தேன்.
அதன்பிறகுதான், 17.11.2003 அன்று தலைமைச் செயற்குழு கூட்டம் நடைபெற்றது. அக்கூட்டத்தில் கழகத்தின் தலைமைப் பொறுப்பை ஏற்றுக்கொள்ளும்படி எம்மை கழகக் குடும்பத்தினர் மட்டுமன்றி. கழக நலன், பொதுநலன் இவற்றில் அக்கறை கொண்ட பல்வேறு துறைகளைச் சேர்ந்த அறிஞர் பெருமக்கள், பொதுப்பணிகளில் பழுத்த அனுபவம் வாய்ந்தவர்கள், கட்சிகளுக்கு அப்பாற்பட்ட பெருமக்கள், தமிழகம் தழுவிய அளவில் மட்டுமல்லாது, பல நாடுகளைச் சேர்ந்த பெருமை வாய்ந்த தமிழின உணர்வாளர்கள் ஆகியோர்களின் ஆலோசனை  நல்லெண்ண வற்புறுத்தல் அடிப்படையிலும், கழகப் பொறுப்பாளர்கள், கழகக் குடும்பத்தினர்களின் கனிவான தொடர் வேண்டுகோளின் அடிப்படையிலும், வலிமை வாய்ந்த தலைமை இயக்கத்திற்கு மிகமிகத் தேவை என்கிற காலகட்டத்திலும், திராவிடர் கழகத்திற்குத் தலைவர் என்கிற பொறுப்பினை ஏற்றுச் செயல்படுவது மிகமிக அவசியம் என்று கருதி, எம்மை திராவிடர் கழகத்தின் தலைவர் என்கிற பொறுப்பினை ஏற்றுச் செயல்பட வேண்டும் என்று திராவிடர் கழகத் தலைமை செயற்குழுக் கூட்டம் ஒருமனதாகத் தீர்மானித்து நிறைவேற்றி திராவிடர் கழகத் தலைவர் பொறுப்பினை ஏற்கும் கட்டாயம் நிகழ்ந்தது.

எனவே, நம் இயக்கக் குடும்பத்தவர்களுக்கு என் அன்பு வேண்டுகோள் என்னவென்றால், இயக்கப் பணிகளை மேலும் மேலும் தீவிரப்படுத்துங்கள்.
1948இல் இயக்கத்தின் பெட்டிச் சாவியை அண்ணாவிடம் தருகின்ற மாநாடு என்று பேசிய நம் தலைவர் தந்தை பெரியார், ஈரோடு (ஸ்பெஷல்) மாநாட்டின் தலைவரான அண்ணாவை ஒரு திறந்த காரில் அமர்த்தி, அவர் நடந்து வந்ததை அருகில் இருந்து பார்த்து, உரையைக் கேட்டு பயிற்சி பெற்றேன். பெரியார் தந்த புத்தியைத்தானே இதிலும் பயன்படுத்தியுள்ளேன்?

நம் பிரச்சாரம் நம் ஏடுகள்; நம் நூல்கள் – நம் கொள்கைகள் பரவுவதை மேலும் தீவிரப்படுத்துவதற்கு உங்கள் பங்கையும், பணியையும் ஆற்றுவதற்கு, புதியவர்களுக்கு ஊக்கம் தந்து, இயக்கத்தின் வரலாற்றில் மேலும் சிறப்பான பொன்னேட்டை இணையுங்கள்.
வேறு எவராலும் முடியாதது நம்மால் மட்டும்தான் முடியும் என்று தன்னம்பிக்கையின் தள நாயகர்களாக வீறுநடை போடுங்கள்; வெற்றிகளைக் குவியுங்கள்!’’ என்று கேட்டுக்கொண்டேன்.

திராவிடர் கழகப் பொதுக்குழுக் கூட்டம் 27.11.2003 காலை 10:00 மணிக்கு தஞ்சாவூர் கவிதா மன்றத்தில் வரலாற்றுச் சிறப்புமிக்க வகையில் நடைபெற்றது. ராசகிரி கோ. தங்கராசு தலைமையில் நடைபெற்ற இப்பொதுக்குழுவில் 17.11.2003 அன்று நடைபெற்ற தலைமைச் செயற்குழு கூட்டத் தீர்மானங்களுக்கு ஏற்பளிக்கும் தீர்மானங்கள் நிறைவேற்றப்பட்டன.

தலைமைச் செயற்குழுவின் தீர்மானம் வலியுறுத்தியபடி நான் திராவிடர் கழகத் தலைமைப் பொறுப்பை ஏற்க ஒப்புக்கொண்டமைக்கு தலைமைச் செயற்குழுக் கூட்டம் தனது நன்றியினைத் தெரிவித்தது.

மேலும் நான், கழகத்தின் தலைவர் பொறுப்பினை ஏற்று கழகத்தை வழிநடத்த வேண்டுமாய் பொதுக்குழுவில் தீர்மானிக்கப்பட்டது.

அப்பொதுக்குழுவில் நான் உரையாற்றுகையில்,

“கட்டளையிடுங்கள், கட்டளையிடுங்கள் என்று இதுவரை நீங்கள் கேட்டுக்கொண்டிருந்தீர்கள். நான் கட்டளை இட்டேனா இல்லையா? என்பது எனக்குத் தெரியாது. ஆனால், கழகத் தோழர்களாகிய நீங்கள் கட்டளையிட்டிருக்கின்றீர்கள். நீங்கள் இட்ட கட்டளைக்கு நான் அடிபணிந்திருக்கின்றேன்.
பிரச்சாரத்தை முன்னெடுத்துச் செல்வதற்காக பல பொறுப்புகளில் பல பேரை அமர்த்துகின்றோம்.

அப்படிப்பட்ட நிலையிலே மேலும் இந்தப் பிரச்சாரங்கள் ஒருங்கிணைந்து நடைபெறவேண்டும் என்ற எண்ணத்தோடு 52 மாவட்டங்களை உள்ளடக்கிய நிலையிலே தமிழ்நாடு அய்ந்து கோட்டங்களாகப் பிரிக்கப்படுகின்றது. இது ஒரு புதிய அறிவிப்பு. (பொறுப்பாளர்கள் _ இதற்குரிய கோட்ட அமைப்பு ஏற்கனவே ‘விடுதலை’யில் வெளியிடப்பட்டுள்ளன). இந்த மண்டலப் பொறுப்பாளர்கள் அனைவரும் இந்தப் பிரச்சாரத்தை ஒருங்கிணைப்பார்கள்.
பொறுப்புகள், மாற்றங்கள் என்பது ஒரு பெரிய முக்கியமான காரியமல்ல. செயல் சிறப்பாக நடைபெறவேண்டும் என்பதற்காகத்தான் இந்த மாற்றங்கள்.
பெரியார் தொண்டர்களுக்கு நான் தொண்டன். நீங்கள் என்னதான் வேண்டுமானாலும் என்னை அழைத்தாலும் நான் பெரியாருக்குத் தொண்டன். அன்றும், இன்றும், என்றும் நான் பெரியாருடைய தொண்டன்தான். பெரியார் தொண்டன் மட்டுமல்ல. ‘பெரியார் தொண்டர்களுடைய தொண்டனுக்கும் தொண்டன் நான்_

அன்றும், இன்றும், என்றும்.எனவே, என்னைப் பொருத்தவரையிலே எனது இறுதி முச்சு இருக்கிறவரை அந்த மனநிலையிலிருந்து என்னால் விடுபட முடியாது.
நான் தெளிவாகச் சொல்லுகின்றேன். நான் இயக்கத்தை விட்டு போய்விடப் போகிறேன்; மற்றவர்கள் அந்தப் பொறுப்பை பார்த்துக் கொள்வார்கள் என்று நான் 8-ஆம் தேதி சொல்லவில்லை.

இன்னும் கேட்டால் ஓய்வாக இருக்கப் போகிறீர்களா? என்றும் பல நண்பர்கள் கேட்டார்கள். நான் ஓய்வாக இருக்கவேண்டும் என்பதற்காக இந்தப் பணிமாற்றம் செய்யவில்லை. இந்த பணி இன்னும் சிறப்பாக நடைபெற வேண்டும். அதிகமாக உழைப்பதற்கு ஒரு வாய்ப்பை ஏற்படுத்திக் கொள்ள வேண்டும் என்பதற்காகத்தான் இதைச் செய்தோம்.
அதுமட்டுமல்ல- ஒரு தவறான நிலை என்னவென்று சொன்னால், ஒரு தலைமைப் பொறுப்பிலே இருக்கக் கூடியவர்கள் அவர்கள் காலத்தில் அடுத்தவர்களை அறிமுகப்படுத்துவது என்பதைச் செய்தால், ஏதோ ஒரு மிகப்பெரிய வரலாற்றுக் குற்றம் செய்துவிட்டதைப் போல ஒரு கருத்து நம்முடைய நாட்டிலே சரியாகவோ, தவறாகவோ உள்ளே நுழைந்துவிட்டது.

தோள்சீலைப் போராட்டம்

கட்டுரை – 

2023 கட்டுரைகள் மற்றவர்கள் மே-16-31,2023

May 23, 2023உண்மை Unmai

குடியாத்தம் தேன்மொழி

இந்திய வரலாறு பல கசப்பான உண்மைகளை தன்னகத்தே கொண்டது. பல இழிவுகளைச் சுமந்தது. மனிதநேயம் என்ற ஒன்றையே மறந்து மக்கள் தன் இனத்தையே இழிவாக நடத்திய வரலாறும் உண்டு. அப்படிப்பட்ட ஒரு வரலாறு 200 ஆண்டுகால முந்தையது. மதத்தைக் காரணம் காட்டி சாதியைக் காரணம் காட்டி மிக மிக மோசமான நிலையில் மனிதர்கள் நடத்தப்பட்டார்கள் என்பது வேதனையான செய்தி எனில் பெண்கள் மானமிழந்து வாழ்ந்தனர் என்பது கொடுமையான நிகழ்வாக இருக்கிறது.

அரை நிர்வாணமாக மக்கள் இடுப்புக்கு மேலே ஆடை அணியக்கூடாது என்று பெண்களும் ஆண்களும் ஒடுக்கப்பட்டு, அடிக்கப்பட்டு, விரட்டப்பட்டு, சித்திரவதை செய்யப்பட்டு இருந்தார்கள் என்ற வரலாறு துயரத்தைத் தருவதாக இருக்கிறது.

தங்கள் மானம் காக்க சுயமரியாதை காக்கத் தெரியாதவர்களாய் வாழ்ந்தும் பின்னாளில் மானம் காக்கவும் மக்கள் நடத்திய போராட்டமே தோள் சீலைப் போராட்டம் என்பது. தென் திருவிதாங்கூர் பகுதியான குமரி மாவட்டம் இந்திய வரலாற்றில் மிக வலுவான ஒரு மனித உரிமை போராட்டம் நடந்த இடம். அங்கே உயர்ந்த இடத்தில் இருந்தவர்கள் வந்தேறிகளான ஆரியர்கள். உழைக்கும் மக்களிடம் இருந்து அனைத்தையும் சுரண்டுபவர்களாக அவர்கள் இருந்தார்கள். இதற்கு மன்னர்களையும் அதிகாரிகளையும் தங்களுக்குச் சாதகமாகப் பயன்படுத்தும் ஆற்றல் பெற்றவர்களாக இருந்தனர். அவர்கள் நம்பூதிரிகள் என்று அழைக்கப்பட்டனர். கல்வி முதல் அனைத்தும் தங்களது ஆக்கியதோடு அக்கல்வி மற்றவருக்குச் சேராமல் பார்த்துக் கொண்டனர் என்பதும் முக்கியமான வரலாறு.

இவர்களுக்கு அடுத்த நிலையில் இருந்த நாயர்கள் சூத்திரர்கள் ஆயினும் அதிகாரம் மிக்கவர்களாக இருந்தனர். அதே சமயம் நம்பூதிரிகளுக்கு அடங்கியிருந்தனர். அதாவது இரவு நேரத்தில் நம்பூதிரி இவர்கள் வீட்டின் பின்பக்கம் வந்தால் இவர்கள் வீட்டுப் பெண்களை அவர்களிடம் ஒப்படைத்து ஒதுங்கிக் கொள்ளும் கீழ்த்தரமான வழக்கம் கொண்டவர்களாக இருந்தனர். .நாடார் சமூகத்தினர் சாணார் சமூகத்தின் ஒரு பிரிவினர். இவர்கள் ஜாதிக்குப் புறம்பானவர்கள். இவர்களோடு ஈழவர், புலையர் போன்று பல ஜாதிகள் இழி நிலையில் இருந்தனர். இவர்கள் சமூகத்தில் ஒதுக்கப்பட்டவர்களாக வாழ்ந்தார்கள். இவர்கள் தீண்டப்படாதவர்களாக இருந்தார்கள். உரிமைகள் மறுக்கப்பட்டவர்களாக இருந்தார்கள்.

அடிப்படை வசதிகள் கூட இவர்களுக்குக் கிடையாது. காலணி அணியக்கூடாது. இவர்கள் குடைகளைப் பயன்படுத்தக்கூடாது. மாடி
வீடு கட்டக்கூடாது. ஓட்டு வீடு கூட கூடாது. பெண்கள் பொன் நகை அணியக்கூடாது. இதையெல்லாம் தாண்டி இவர்கள் இடைக்கு மேல் உடை உடுத்தக்கூடாது. பெண்கள் மார்பகங்களை மூடக்கூடாது ஜாதியின் பெயரால் எவ்வளவு மோசமான காட்டுமிராண்டித்தனமான கட்டுப்பாடுகள் இருந்திருக்கின்றது.

ஒரு மனிதனின் அடிப்படை உரிமை என்பது உடையும் இருப்பிடமும். இது இந்த மக்களுக்கு மறுக்கப்பட்டு இருந்தது. இப்படி அடிப்படை உரிமைகளைக்கூட பெறாமல் மக்கள் வாழ்ந்து இருக்கின்றார்கள் என்பதும் மேலாடை இல்லாமல் பெண்கள் வாழ்ந்து இருக்கின்றார்கள் என்பதும் அதிர்ச்சியான வேதனையான செய்தியாக இருக்கிறது. அதைவிட கொடுமை ஆணுக்கு தலைக்கும் பெண்ணுக்கு முலைக்கும் வரி விதிக்கப்பட்டிருந்தது. அதையும் அம்மக்கள் செலுத்தி கொண்டு இருந்தார்கள்.

மனித இனம் மற்றொரு மனிதனை ஆடையின்றி பார்த்துக் கொண்டிருந்தது. ஆடை மறுத்து கொடுமை செய்து கொண்டிருந்தது. இது இந்திய வரலாற்றில் அழிக்க முடியாத அவலமாய். ஆதிக்க ஜாதிகள் நம்பூதிரிகளோடு சேர்ந்து நாயர் இன மக்களும் அடித்தட்டு மக்களுக்கு ஆடை சுதந்திரம் தரக்கூடாது என்பதில் உறுதியாக நின்றனர்.

1806 ரிங்கல் தவுபே அய்யர் என்பவர் கிறிஸ்துவம் பரப்ப குமரி மண்ணுக்கு வந்தவர், மேலாடை இன்றி இருந்த பெண்களைப் பார்த்து பரிதாபப்பட்டு அவர்களுக்கு குப்பாயம் எனும் ஆடை கொடுக்கின்றார். அந்த ஆடைக்காகவே அன்று ஏராளமான பெண்கள் மதம் மாறி கிறிஸ்துவத்தைத் தழுவி இருக்கின்றார்கள். கிறிஸ்துவக் கொள்கை கோட்பாடுகளால் மதம் மாறவில்லை. ஜாதிய இழிவில் இருந்து தங்களை மீட்டுக் கொள்ள மதம் மாறினார்கள். தங்கள் திறந்த மார்பகங்களை மறைக்க வழி கிடைத்ததே என்று மதம் மாறினார்கள். மதம் மாறிய பெண்கள் மார்புகளை மறைத்து ஆடை அணிந்தனர். அதைக் கண்டு இந்துப் பெண்களும் மார்பை மறைத்து ஆடை அணிந்தனர் அதோடு நிற்காமல் நாயர் பெண்களைப் போன்று தோள் சீலையும் அணிந்தனர்.

இதை எதிர்த்தவர்கள் போராட்டம் நடத்தியவர்கள் உயர்ஜாதியைச் சேர்ந்த பெண்களுமே. தங்களுக்கு இணையாக ஒடுக்கப்பட்ட ஜாதியைச் சேர்ந்த பெண்கள் தோள் சீலை அணிவதை அவர்களால் ஏற்றுக்கொள்ள முடியாமல் அதை கலாச்சார கேடாகக் கருதி அவர்கள் புகார் அளிக்கின்றனர்.

ஒரு நாயர் பெண்மணி மார்புகளை மறைத்துக்கொண்டு மகாராணியைக் காண அரண்மனை சென்ற பொழுது அந்த மகாராணி இவர் மார்பகத்தை மறைத்து இருப்பதை ஏற்றுக் கொள்ள முடியாமல் பணியாளர்களை விட்டு அந்தப் பெண்ணின் முலைகளையும் வெட்டி வீசி உள்ளதாக james Fordes â¿Fò oriantal memorial.. London (1836) என்ற தன் நூலில் ஆதாரமாகத் தந்துள்ளார் .ஆதாரம். John Henry Grouse â¿Fò ‘A voyage to the East Indies’.
“கேரள சரித்திரத்தின் இருளடைந்த ஏடுகள்” என்ற மலையாள நூலின் ஆசிரியர் இளம்குளம் குஞ்ஞன் பிள்ளை இன்னுமொரு தகவலை தருகிறார்.தங்கள் மார்பகத்தை மறைத்து ரவிக்கை அணிந்து கோவிலுக்கு வந்த நாயர் பெண்ணின் ரவிக்கையை கிழிக்க சொல்லி உத்தரவிட்டது கொச்சி அரச குடும்பத்து ராணி.அதற்கும் மேலாக யாராவது ரவிக்கை அணிந்து கோவிலுக்கு வந்தால் அவர்களின் ரவிக்கையை கிழிக்க உயர்நிலையில் இருந்த நாயர் சமூகத்து இளைஞர்களே நியமிக்கப்பட்டனர்.

ஆனாலும் ரிங்கல் தவுபே முயற்சியால் பெண்கள் மதம் மாறி மேலாடை அணிந்தனர். அதே சமயம் ஆதிக்க ஜாதியில் புகாரினால் தோள் சீலை அணிய மட்டும் தடை விதிக்கப்பட்டது. மார்பினை மட்டும் மறைக்க உரிமை வழங்கப்பட்டது. இந்த உரிமை ஆதிக்க ஜாதிகளுக்கு மனதைத் திருப்தி செய்யாததால் மீண்டும் மீண்டும் கலவரம் ஏற்படுத்தினர். 1822 கிறிஸ்துவ நாடார் பெண்கள் மேல் ஆடை அணிந்து ஆலயம் சென்ற பொழுது அவர்கள் மேலாடைகளை அறுத்து அவைகளை மரங்களில் கொடி போல தொங்கவிட்டு நாடார் இனப் பெண்களை இழிவு படுத்தியவர்கள் நாயர் இன ஆண்கள்.

திருவிதாங்கூர் மகாராஜா ஆண்டுக்கு இருமுறை கடற்கரை ஆறாட்டு விழாவிற்குச் சென்றால் அவர் செல்லும் பாதையில் பல நூறு பெண்கள் திறந்த மார்புகளோடு கையில் விளக்கேந்தி அரசரின் பின் நடக்க வேண்டுமாம். எவ்வளவு பெரிய பெண் இழிவு! பல ஆண்டுகளாக இந்த இழிவு தொடர்ந்து வந்திருக்கிறது. இந்த வழக்கம் ஒழிவதற்காக மன்னரிடம் வேண்டியது மிஷினரிகளே. அதன் பின்னரே மன்னர் இந்த வழக்கம் பின்பற்ற வேண்டியதில்லை என்று ஆணை வெளியிட்டார்.

ஆதாரம் (குமரி மண்ணில் கிறிஸ்துவம்)

இப்படிப்பட்ட இழிவுகளை எல்லாம் அகற்றப் போராடியவர்கள் அயல்நாட்டில் இருந்து வந்த கிறிஸ்துவ மிஷனரிகள் என்பது வரலாறு. அவர்கள் கொடுத்த ஆதரவும் தைரியமும்தான் பெண்களை மேலாடை அணியப் போராட வைத்தது என்றால் மிகையாகாது. வைகுண்ட அய்யர், இராமன் தம்பி போன்றோர் போராடினாலும் பெரும் பங்காற்றியது கிறிஸ்துவ மிஷனரிகளே.

மிஷனரிகள் கொடுத்த ஆதரவு பெண்களுக்கு மிகப்பெரிய பலத்தையும் தைரியத்தையும் கொடுத்தது. 43 ஆண்டுகால போராட்டம் பெண்கள் மார்பகம் மறைத்து ஆடை அணியவே உரிமை தந்தது. நாயர் இனப் பெண்கள் போல தோள் சீலை அணிய உரிமை தரவில்லை. ஆனால், நாடார் இனப் பெண்கள் தாங்களே அந்த உரிமையை எடுத்துக்கொண்டனர் .அவர்களைத் தொடர்ந்து ஈழவர், புலையர், பறையர் இனப் பெண்கள் மார்பை மறைக்கத் தொடங்கினர். மேல் ஜாதிப் பெண்களைப் போல தோள் சீலை அணிய உத்தரவு வராத போதிலும் பெண்கள் தோள் சீலை அணிந்து துணிந்து வெளியே வந்ததுதான் தோள் சீலைப் போராட்டத்தின் வெற்றியாக அமைந்தது.

இந்த அரை நூற்றாண்டு காலப் போராட்டம் வெற்றியைத் தேடித் தந்தது என்றாலும் மிகப்பெரிய உண்மையைச் சொல்கிறது.
மனிதகுலம் எப்பொழுது எல்லாம் மனித நேயம் தாண்டி மதம் என்ற போர்வையில் ஜாதிய வண்ணம் கொண்டு அடுத்தவரைக் கொடுமை செய்தாலும், அந்த இழிநிலையைத் துடைக்கவென்றால் பாதிக்கப்பட்டவர்கள் வீரியத்துடன் போராட வேண்டும் என்ற மிகப்பெரிய உண்மையை சொல்கிறது இந்த தோள் சீலைப் போராட்டம். அங்கே மதங்களைத் தாண்டி மனிதர்கள் இணைந்ததால் ஆதிக்க ஜாதிகளை எதிர்க்க முடிந்தது வெற்றியையும் சுவைக்க முடிந்தது. இந்த ஆண்டு தோள்சீலைப் போராட்டத்தின் 200ஆம் ஆண்டு. தங்கள் மானம் காக்க தோள்சீலைப் போராட்டம் நடத்திய அத்தனை மகளிருக்கும் வாழ்த்துகள்…
(

கருத்து உதவி : தோள்சீலைப் போராட்டம்
– கொல்லால் எச். ஜோஸ்)

காரைக்குடி அழகப்பா பல்கலைக்கழகம் அளித்த மதிப்புறு முனைவர் பட்டம்!

அய்யாவின் அடிச்சுவட்டில்…- 

2023 அய்யாவின் அடிச்சுவட்டில் ஏப்ரல் 1-15,2023

April 5, 2023உண்மை Unmai

இயக்க வரலாறான தன் வரலாறு (313)
கி.வீரமணி

(கட்டுரையின் ஒரு பகுதி)

காரைக்குடியில் உள்ள அழகப்பா பல்கலைக்கழகத்தில் மதிப்புறு டாக்டர் பட்டம் (D.Litt) எமக்கு வழங்கிச் சிறப்பிக்கப்பட்டது எனக்கு மதிப்புறு முனைவர் பட்டம் அளிக்க பல்கலைக்கழக ஆட்சிக் குழு முடிவு செய்து அறிவிப்பு வெளியிடப்பட்டபின், பல நாள்கள் கழித்து, ‘தினமலர்’ வெளியீட்டாளர் ஆர். இலட்சுமிபதி அவர்கள் பெயரும் இணைக்கப்பட்டது. இது குறித்த ஒரு செய்தியை நான் பின்னாட்களில் அறிந்தேன். பல்கலைக் கழக ஆட்சிக் குழு முடிவு செய்து வேந்தரின் ஒப்புதலும் பெறப்பட்டு, விழாவிற்கான அழைப்புகள் எல்லாம் தயாராகி விட்டபின், அந்தப் பெருமை எனக்கு தனியே ஏற்பட்டு விடக்கூடாது என்று நினைத்த சிலர், ஆளுநர் மாளிகைக்கு அன்றைய ஆளுநரான ராம்மோகன் ராவ் அவர்களுக்கு அழுத்தம் கொடுத்து திடீரென்று தினமலர் வெளியீட்டாளருக்கும் சேர்த்து தர வேண்டும் என்று வற்புறுத்தவே, ஆளுநர் மாளிகையிலிருந்து அறிவிப்பு வெளியிடப்பட்டது. அதன்பின் விதிகளை மீறி அவரது பெயரும் இணைக்கப்பட்டது. பார்ப்பனர்களுக்கு சட்டம், வளைந்து கொடுத்தது.

அழகப்பா பல்கலைக்கழகத்தின் (காரைக்குடி) பதினைந்தாம் பட்டமளிப்பு விழா 4.4.2003 வெள்ளிக்கிழமை முற்பகல் 10:15 மணிக்குத் தொடங்கியது.

பட்டமளிப்பு விழா மரபுப்படி முதலாவதாக தமிழ்நாடு ஆளுநரும் பல்கலைக்கழக வேந்தருமான ராம்மோகனராவ், துணைவேந்தர் டாக்டர் அ. இராமசாமி, மதிப்புறு முனைவர் பட்டம் அளிக்கப்பெறும் நாமும், ‘தினமலர்’ வெளியீட்டாளர் ஆர். லட்சுமிபதி, செனட் உறுப்பினர்களுடன் பட்டமளிப்பு நடைபெறும் முருகப்பா அரங்கிற்குச் சென்றோம்.

தமிழ்த்தாய் வாழ்த்துடன் விழா தொடங்கப்பட்டது. தமிழ்நாடு ஆளுநர் விழாவிற்குத் தலைமை தாங்கினார்.
பல்கலைக்கழகத் துணைவேந்தர் டாக்டர் அ. இராமசாமி அவர்கள் வரவேற்புரையாற்றி
னார். பல்கலைக் கழகத்தின் சாதனைகள் சிறப்புத் திட்டங்கள், உலகளாவிய அளவில் அதன் தொடர்புகள், செயல்பாடுகள் குறித்து துணைவேந்தர் விரிவாக அவ்வுரையில் குறிப்பிட்டார்.

எமக்கு மதிப்புறு டாக்டர் பட்டம் அளிக்கப்படுவதற்குமுன் எமது சிறப்பு இயல்புகளை, சாதனைகளை, கல்வித் தகுதிகளை, அரை நூற்றாண்டைக் கடந்த தொண்டுப் பணிகளை பட்டியலிட்டுக் காட்டினார் துணைவேந்தர். (சிவீtணீtவீஷீஸீ) மகளிர் கல்வி, மகளிர் முன்னேற்றம், சமூகநீதி, சமூக சீர்திருத்தம் முதலிய துறைகளில் எமது பணிகளைப் பாராட்டி டாக்டர் பட்டம் வழங்கப்படுவதாக அதில் குறிப்பிட்டார். (பெட்டிச்செய்தி காண்க)சரியாக 10:40 மணிக்கு மதிப்புறு டாக்டர் (டி.லிட்) பட்டத்தினை எமக்கு தமிழ்நாடு ஆளுநர் பல்கலைக் கழகவேந்தர் மேதகு ராம்மோகனராவ் அவர்கள் நீண்ட கரவொலிக்கிடையே வழங்கினார்கள்.

40 ஆண்டுகளாகப் பத்திரிகைத்துறையில் சிறந்த சேவைகளை புரிந்ததற்காக ‘தினமலர்’ வெளியிட்டாளர் ஆர். லட்சுமிபதி அவர்களுக்கு மதிப்புறு டாக்டர் பட்டம் வழங்கப்படுவதாகத் துணைவேந்தர் அறிவிக்க, அதனைத் தொடர்ந்து மேதகு ஆளுநர் அவர்கள் பட்டத்தினை வழங்கினார்.

டாக்டர் அழகப்பா செட்டியார் அவர்களின் மகளும் பல்கலைக் கழக ஆயுள்கால ஆட்சிமன்றக்குழு உறுப்பினருமாகிய உமையாள் ராமநாதன் அவர்கள் சிறப்பு விருந்தினராகப் பங்கேற்று பட்டமளிப்பு விழாப் பேருரையை நிகழ்த்தினார்.
மக்கள் தொகையில் சரி பாதி பெண்கள். அவர்கள் முன்னேற்றம் என்பது சமுதாய முன்னேற்றமாகும். ஆனாலும், நடைமுறையில் உயர்கல்வி, பெரிய பதவிப் பொறுப்புகளில் ஆண்களைவிடப் பெண்கள் சதவிகிதம் மிகவும் குறைந்தே காணப்படுகிறது.

ஆனாலும் அழகப்பா பல்கலைக்கழகம் பெண் கல்விக்கு உரிய இடத்தைத் தருகிறது; இப்பல்கலைக்கழகத்தில் மாணவர்களைவிட மாணவிகளின் சேர்க்கை மிக அதிகமாக உள்ளது. கடந்த ஆண்டு பட்டம் பெற்றவர்ள் 407 பேர்களில் 236 பேர் பெண்கள்; தங்கப்பதக்கம் பெற்ற 21 பேரில் 15 பேர் பெண்கள் என்று மிகவும் பெருமிதமாகச் சுட்டிக்காட்டினார் உமையாள் ராமநாதன் அவர்கள்.

விழாவில் ஆளுநர் அவர்கள் 54 பேர்களுக்கு டாக்டர் பட்டமும், நூறு பேர்களுக்கு எம்.ஃபில். பட்டமும் 356 மாணவ-மாணவியர்களுக்கு முதுகலை மற்றும் பி.எட்., பட்டமும் வழங்கிப் பாராட்டினார். மொத்தம் 510 பேர் நேரில் பட்டங்களைப் பெற்றுக் கொண்டனர்.
தமிழகம் தழுவிய அளவில் கழகத் தோழர்களும், பொறுப்பாளர்களும் காரைக்குடிக்கு திரண்டு வந்து மகிழ்ச்சியைப் பரிமாறிக் கொண்டனர்.

அழகப்பா பல்கலைக் கழகம்
அளித்த சிறப்புக் குறிப்புகள்…

2003 ஏப்ரல் 4ஆம் தேதி காரைக்குடி அழகப்பா பல்கலைக்கழகத்தில் நடைபெற்ற பதினைந்தாவது பட்டமளிப்பு விழாவில்
கி. வீரமணி அவர்களுக்கு இலக்கியத்துக்கான மதிப்புறு முனைவர் (டாக்டர்) பட்டத்தை வழங்கியபோது பல்கலைக்கழகத் துணை வேந்தர் முனைவர் அ. ராமசாமி அவர்கள் ஆற்றிய குறிப்புரை.
பல்கலைக் கழக வேந்தர் அவர்களே!
சமூகத்தின் நலிந்த பிரிவு மக்களின் நலனுக்காகவும், பெண்கள் உரிமைக்காகவும் போராடத் தன்னை அர்ப்பணித்துக் கொண்ட கழகத் தொண்டரும், சமூகநீதிப் போராளியுமான திரு.கி. வீரமணி அவர்களைத் தங்களுக்கு அறிமுகப்படுத்துவதில் நான் பெரு மகிழ்ச்சியும் பெருமிதமும் அடைகிறேன்.
தமிழ்நாட்டைச் சேர்ந்த கடலூரில் 1933 டிசம்பர் 2ஆம் தேதி அன்று பிறந்த திரு.கி. வீரமணி கல்வி அறிவில் சிறந்து விளங்கினார். அண்ணாமலைப் பல்கலைக் கழகத்தில் பொருளியலில் முதுகலைப் பட்டப் படிப்பில் பயிலும் போது மதிப்பு மிகுந்த தங்கப் பதக்கம் அவருக்கு அளிக்கப்பட்டது. சென்னைப் பல்கலைக் கழகத்தில் சட்டக்கல்வி பயின்று 1960இல் பட்டம் பெற்ற அவர் அந்த ஆண்டிலேயே தன்னை ஒரு வழக்குரைஞராகப் பதிவு செய்துகொண்டார்.
திரு.கி. வீரமணி அவர்கள் ஓர் ஆழ்ந்த சிந்தனையாளரும், மாபெரும் எழுத்தாளருமாவார். தமிழிலும் ஆங்கிலத்திலும் அவர் எழுதியுள்ள அய்ம்பதுக்கும் ‘மேற்பட்ட நூல்களே அதற்குத் தகுந்த சான்றாகும். அவரது நூல்களில் சிறப்பானவை:
சமூகநீதிக்காகத் தமிழ்நாட்டில் மேற்கொள்ளப்பட்ட போராட்ட வரலாறு,

மனித நேயமும் நாகரிகமும், பெரியார் களஞ்சியம் (ஆறு தொகுதிகள்) விடுதலைப் போரும் திராவிட இயக்கமும் – உண்மை வரலாறு.
அத்துடன் அவர் ‘விடுதலை’ என்னும் தமிழ் நாளேடு, ‘உண்மை’ என்னும் தமிழ் மாதமிருமுறை இதழ், ‘மாடர்ன் ரேஷனலிஸ்ட்’ என்னும் ஆங்கில மாத இதழ் ஆகியவற்றின் ஆசிரியருமாவார்.

தமிழிலும் ஆங்கிலத்திலும் நன்கு பேசவல்ல ஆற்றல்மிகு பேச்சாளரான அவர், தனது மாணவப் பருவம் முதற்கொண்டே பல விருதுகளையும் பரிசுகளையும் பதக்கங்களையும் பெற்று வந்துள்ளார்.

அவர் பல சர்வதேச, தேசிய அளவிலான கருத்தரங்குகளிலும் கலந்து கொண்டுள்ளார். 1985இல் டென்மார்க் நாட்டு தலைநகர் கோபன்ஹேகன் நகரில் நடைபெற்ற பன்னாட்டு அமைதி மாநாடு, 1995இல் அமெரிக்காவில் நடைபெற்ற தமிழ்நாடு நிறுவனத்தின் ஆண்டு மாநாடு, 1998இல் மும்பையில் மனிதநேய அறநெறி ஒன்றியத்தினால் ஏற்பாடு செய்து நடத்தப்பட்ட சர்வதேசக் கருத்தரங்கம் ஆகியவை அவற்றில் குறிப்பிடத்தகுந்தவையாகும். தமிழ்நாட்டுப் பல்கலைக்கழகம், புதுச்சேரிப் பல்கலைக்கழகம் ஆகியவற்றில் அவர் பல நினைவுச் சொற் பொழிவுகளை ஆற்றியுள்ளார்.

உலகெங்கும் பரவலாகப் பயணம் செய்துள்ள அவர் மலேசியா, சிங்கப்பூர், இலங்கை, அமெரிக்கா, இங்கிலாந்து, கனடா, ரஷ்யா, ஜப்பான், மியான்மர் மற்றும் பல இதர அய்ரோப்பிய நாடுகளுக்கும் பலமுறை சென்று பல கருத்தரங்குகளிலும் மாநாடுகளிலும் சிறப்புச் சொற்பொழிவுகளாற்றியுள்ளார்.

தந்தை பெரியார் அவர்களாலும், அவர்களின் பகுத்தறிவுச் சிந்தனைகளாலும் தனது இளம் வயது முதலே கவரப்பட்ட திரு. வீரமணி அவர்கள் சுயமரியாதை, பகுத்தறிவு, பெண்களுக்கான சமஉரிமை, ஆகிய பெரியார் அவர்களின் கொள்கைகளைப் பரப்ப தீவிரப் பிரச்சாரம் மேற்கொண்டு வருபவர் ஆவார். சமூகநீதிக்காகவும், மனித உரிமைகள், பெண்கள் சமஉரிமை போன்ற தேசிய முக்கியத்துவம் வாய்ந்த பிரச்சினைகளுக்காகவும் போராடும் ஒரு சமூகத் தொண்டராக இவர் தனது அய்ம்பது ஆண்டுகளுக்கும் மேலாக பொது வாழ்வில் திகழ்கிறார்.
பெரியார் அவர்களின் கொள்கைகளைப் பரப்ப இவர் பல நிறுவனங்களை உருவாக்கியுள்ளார். அவற்றில் முக்கியமானவை:
* பெரியார் தத்துவக் கொள்கை பரப்பும் பன்னாட்டு மய்யம்
* மகளிர் மேம்பாடு மறுமலர்ச்சிக்கான பெரியார் அமைப்பு (‘பவர்’)
பெண்களும் சமூகத்தில் நலிவடைந்த பிரிவு மக்களும் கல்வியறிவு பெற வேண்டியதன் அவசியத்தை உணர்ந்த அவர், தனது ஆசானான பெரியார் அவர்களின் பெயரில் பல கல்வி நிறுவனங்களையும், அறக்கட்டளையையும் உருவாக்கியுள்ளார்.
இக்கல்வி நிறுவனங்கள்:
* பெரியார் மணியம்மை மகளிர், பொறியியற் கல்லூரி, வல்லம், தஞ்சாவூர் (பெண்களுக்கென முதன்முதலாகத் தொடங்கப்பட்ட முற்றிலும் பெண்களுக்கான பொறியியற் கல்லூரி இதுவே!
* பெரியார் அய்.ஏ.எஸ்., அய்.பி.எஸ்., பயிற்சி மய்யம், சென்னை.
* பெரியார் கணினி உயர்கல்விக் கல்லூரி, திருச்சி.
* பெரியார் மருந்தியல் மகளிர் கல்லூரி,
பாராட்டத்தக்க சமூகத் தொண்டாற்றிய திரு.கி.வீரமணி அவர்கள் பல விருதுகளையும் பெற்றுள்ளார். அவற்றில் ஒரு சிலவற்றை இங்கு குறிப்பிடலாம்.
* சமூக நீதி இயக்கத்திற்காக சிறப்பான முறையில் தொண்டாற்றியதற்காக தமிழ்நாடு அரசால் வழங்கப்பட்ட சமூக நீதிக்கான “பெரியார் விருது.’’
சுற்றுச் சூழல், சுகாதாரம், வறுமை ஒழிப்பு, பெண்கள் முன்னேற்றம் போன்ற துறைகளில் அவர் ஆற்றிய தொண்டினைப் பாராட்டிப் பெருமைப்படுத்தும் முறையில் சமூக வளர்ச்சித் திட்டத்தின் கீழ், கனடா அரசால் வழங்கப்பட்ட ‘சிடா’ சிறப்பு நிலைப் “பன்னாட்டு விருது.’’
புதுடில்லி தேசிய முன்னேற்ற முன்னணியால் வழங்கப்பட்ட “பாரத் ஜோதி’’ விருது.
சமூகத்தின் பிற்படுத்தப்பட்ட மற்றும் நலிவடைந்த பிரிவு மக்களுக்குக் கல்வி, வேலைவாய்ப்புக் கோரும் சமூக நீதிக்காகவும், குறிப்பாகப் பெண்களின் முன்னேற்றத்திற்காகவும், பெண்களின் உரிமைகளுக்காகவும் இடைவிடாது போராடி வருபவரான திரு.கி. வீரமணி அவர்களுக்கு இலக்கியத்துக்கான கவுரவ டாக்டர் (முனைவர்) பட்டம் வழங்க அழகப்பா பல்கலைக் கழக ஆலோசனைக் குழு (சிண்டிகேட்) பரிந்துரைத்துள்ளதை ஏற்றுக்கொண்டு வழங்குமாறு தங்களைப் பணிவுடன் வேண்டுகிறேன்.

நினைவுகள் நீளும்…

 

தில்லி பெரியார் மையம் இடிப்பை கண்டித்து சைதையில் பொதுக்கூட்டம் - விபிசிங் பங்கேற்பு

அய்யாவின் அடிச்சுவட்டில்…இயக்க வரலாறான தன் வரலாறு (306)

2022 அய்யாவின் அடிச்சுவட்டில் டிசம்பர் 16-31 2022

December 20, 2022உண்மை

டில்லி பெரியார் மய்யம் இடிப்புக்கு சைதையில் வி.பி.சிங் கலந்துகொண்ட கண்டனக் கூட்டம்!
கி.வீரமணி

டில்லியில் பெரியார் மய்யம் இடிக்கப்பட்டதைக் கண்டித்து சென்னை சைதாப்பேட்டையில் நடந்த கண்டனப் பொதுக்கூட்டத்தில் கலந்துகொள்ள மேனாள் பிரதமர் வி.பி.சிங் அவர்கள், 15.12.2001 அன்று சென்னை விமான நிலையம் வந்து சேர்ந்தார். அங்கு எனது தலைமையில் சிறப்பான வரவேற்பு அளிக்கப்பட்டது.
அன்று மாலை சைதாப்பேட்டையில் நடைபெற்ற கண்டனக் கூட்டத்தில் வி.பி.சிங் அவர்கள் ஆற்றிய உரை உணர்வுபூர்வமானது, வரலாற்றுச் சிறப்புமிக்கது. பெரியார் மீதும், நமது இயக்கத்தின்மீது அவர் கொண்டிருந்த அளவற்ற பற்றையும், பிணைப்பையும் அது வெளிப்படுத்தியதோடு, அநீதிக்கு எதிரான அவரது ஆவேசத்தையும் அது வெளிப்படுத்துவதாய் அமைந்தது. அவ்வுரை வருமாறு:
பெரியார் மய்யம் எதற்காகக் கட்டப்பட்டிருக்கிறதென்றால், கல்விக்காகக் கட்டப்பட்டிருக்கின்றது. பெரியார் மய்யம் எதற்காகக் கட்டப்பட்டிருக்கிறது என்று சொன்னால், அங்கு மருத்துவ வசதிக்காகக் கட்டப்பட்டிருக்கின்றது. இப்படி ஏழை, எளிய மக்களுக்காக தொண்டுள்ளத்தோடு, நல்ல காரியங்களுக்-காகக் கட்டப்பட்டிருப்பது, டில்லி பெரியார் மய்யம்.

ஆனால் டில்லி ‘பெருநகர வளர்ச்சிக்குழுமம் எப்படிக் கட்டடம் கட்டியிருக்-கின்றார்கள் என்பதை நீங்கள் தெரிந்து-கொள்ள வேண்டும். அங்கே ஒரு கிளப் கட்டியிருக்கின்றார்கள். பலர் அங்கு வந்து குடிப்பதற்கும் நாட்டியத்தைப் பார்த்து ரசிப்பதற்கும், கூத்தடிப்பதற்கும் இப்படி ஒரு கட்டடத்தை அங்கு சட்டத்திற்குப் புறம்பாகக் கட்டியிருக்கின்றார்கள். இரவு முழுக்க இசை நிகழ்ச்சி நடனம் நடத்திக் கூத்தடிக்கின்றார்கள். அதனால் யாருமே தூங்கக்கூட முடிவதில்லை.
இப்படிப்பட்ட நிலையிலே டில்லி பெருநகர வளர்ச்சிக் குழுமம் தொடர்ந்து நடைபெற்றால் – நான் டில்லி பெருநகர வளர்ச்சிக் குழுமத்திற்கு ஒரு எச்சரிக்கை விடுக்க விரும்புகின்றேன். உங்களுடைய கட்டடத்தை நாங்களே ஆயுதங்களைக் கைகளில் ஏந்தி தகர்த்தெறிவோம் என்பதை இந்த நேரத்திலே தெரிவித்துக்கொள்ளக் கடமைப்பட்டிருக்கின்றேன்.

நீதி என்றால் அது அனைவருக்கும் சமமாக இருக்க வேண்டும்.
வீரமணி அவர்களே! நான் ஒன்றை உங்களுக்குச் சொல்லிக்கொள்ள விரும்புகின்றேன். அந்தக் கட்டடம் இடிக்கப்
பட்ட சமயத்திலே நான் லக்னோவில் இருந்தேன். நான் மட்டும் அன்றைக்கு டில்லியில் இருந்திருந்தால் டில்லி பெரியார் மய்ய கட்டடத்தை இடிக்கும் அந்த புல்டோசர் முன்னால் நின்றிருப்பேன் (பலத்த கைதட்டல்)
நான் டில்லியில் இல்லாதபொழுது மய்ய அரசாங்கம் இடிக்கின்ற வேலையை செய்கின்றது.
நான் லக்னோவில் இருந்தபொழுது டில்லி பெரியார் மய்யத்தை இடித்தார்கள். அதேபோன்று நான் மும்பையில் இருந்த பொழுது அங்கு தாழ்த்தப்பட்ட மக்கள் வசிக்கும் வீடுகளை இடித்தார்கள். இந்த மாதிரி காரியத்தைச் செய்து கொண்டிருக்கின்றார்கள்.

நான் காலையில் ஒரு வேளை வந்து தடுத்து விடுவேனோ என்று நினைத்து இரவிலேயே இடித்துத் தள்ளி முடித்துவிடுகின்றார்கள்.
இங்கு கட்டடம் என்பது பெரிதல்ல. பெரியார் என்பவர் சிமெண்டும், செங்
கல்லும் அல்ல; தந்தை பெரியார் என்பவர் ஒரு தத்துவம்; பெரியார் என்பவர் ஒரு கொள்கை; பெரியார் என்பவர் ஒரு தொலைநோக்கு; பெரியார் என்பவர் ஒடுக்
கப்பட்ட மக்களின் குரலாகத் திகழ்பவர்.
எங்கெல்லாம் அநீதி நிகழ்கிறதோ அங்கெல்லாம் பெரியார் இருக்கிறார். எத்தனை கோயில்களை நீங்கள் இடிக்க வேண்டும் என்று கருதுகின்றீர்க-ள்?
பயங்கரவாதத்தை எதிர்த்து நாம் போராடத்தான் போகிறோம்.
குண்டுகளை வைத்தல்ல, – கருத்துகளை வைத்துத்தான் தீர்வு காணமுடியும்.
ஆனால் ஒன்றைச் சொல்லிக் கொள்ள விரும்புகிறேன்.

மதத் தீவிரவாதம் இருக்கிறதே அது வன்முறையைக் காட்டிலும் மிகப் பயங்கரமானது என்பதை உங்களுக்கு நான் சொல்லிக் கொள்ள விரும்புகின்றேன்.
மதத் தீவிரவாதத்தில் ஓர் உறுதியான நிலையை நாம் எடுத்தாக வேண்டும். இங்குதான் தந்தை பெரியாரின் கருத்துகள் மிக முக்கியமானதொரு கருத்தாக இருக்கின்றது.
குண்டுகளை வைத்து நாம் எதற்கும் தீர்வு காண முடியாது. ஆனால் கருத்து
களை வைத்துத்தான் எதற்கும் நாம் தீர்வு கண்டாக வேண்டும்.
நான் சில நேரங்களிலே கடவுளைப் பார்த்து தொழ விரும்புகிறேன். ‘கடவுளே! எங்களை எல்லாம் மதத்திலிருந்து விடுவிக்கச் செய்யுங்கள் என்று தொழ விரும்புகிறேன்.

நான் குறிப்பாக வீரமணி அவர்களுக்கும், திராவிடர் கழகத் தொண்டர்களுக்கும் என்னுடைய பாராட்டுகளைத் தெரிவித்
துக் கொள்கின்றேன். ஏனென்றால், அறிவார்ந்த முறையிலே செயல்பட்டுக் கொண்டிருக்கின்றீர்கள். அதற்காக உங்களை நான் பாராட்டக் கடமைப்-பட்டிருக்கின்றேன்.
டில்லியில் பெரியார் மய்யம் இடிக்கப்பட்டது என்பது ஒரு கட்சிப்
பிரச்சினை அல்ல. இது ஒரு பொதுப்பிரச்சினை. நான் ஒன்றைச் சொல்லிக்-கொள்ள விரும்புகின்றேன். எல்லா கட்சிக்காரர்களையும் சந்திப்போம்.
எல்லா கட்சிக்காரர்களும் ஒன்று சேர்ந்து நாம் பிரதமரைச் சந்திப்போம். நானும் வருகின்றேன்.
அந்தக் குழு பிரதமரோடு பேசட்டும்! ஆரிய சமாஜத்தினுடைய கட்டடம் இடிக்கப்பட்டது. பிரதமர் அவர்கள் அந்த விசயத்தில் உடனே தலையிட்டார். உடனடியாக ஆரிய சமாஜக் கட்டடம் கட்டி முடிக்கப்பட்டது. அதே போன்று பெரியார் மய்யம் இடிக்கப்பட்டது. இதில் பிரதமர் வாஜ்பேயி தலையிட வேண்டும். இடித்த டில்லி பெரியார் மய்யக் கட்டடத்தை பிரதமர் மீண்டும் அப்படியே கட்டித் தரவேண்டும்.

இந்தக் கோரிக்கையை நாம் வைக்கின்றோம். இந்தக் கோரிக்கையை வைத்தபின்னால்கூட மத்திய ஆட்சியில் உள்ள பி.ஜே.பி. அரசாங்கம் நடவடிக்கை எடுக்கவில்லை என்று சொன்னால், நாம் வேறுவிதமான நடவடிக்கையில் ஈடுபட வேண்டியிருக்கும். வீரமணி அவர்கள் சட்டப் புத்தகத்தில் உள்ள சட்டநடவடிக்கையை எடுத்து என்னிடத்திலே படித்துப் பார்க்கும்படி காட்டினார்கள்.
ஒரு கட்டடத்தை இடிக்கவேண்டும் என்று சொன்னால் அந்தக் கட்டடத்தை கட்டியவர்களுக்கு, கட்டட உரிமையாளர்களுக்கு, 30 நாட்கள் அவகாசம் கொடுக்க வேண்டும் என்கிற சட்டத்தை அவர்கள் காட்டினார்கள். நான் அந்தச் சட்டப்படி போக விரும்பவில்லை. நான் எந்தச் சட்டப்படி போக வேண்டும் என்று விரும்புகிறேன் என்று சொன்னால்,
மத்தியில் ஆட்சியில் உள்ள பி.ஜே.பி. அரசாங்கத்திற்கு டில்லியில் உள்ள பெரியார் மய்யத்தை அதற்குள் கட்டி முடித்துத்தர வேண்டும் என்று ஒரு அவகாசத்தைக் கொடுப்போம்.

அதற்குள்ளாக மத்திய அரசு கட்டித்தரவேண்டும் என்று நாம் கேட்போம்.
அரசாங்கம் சமூக நீதிப்படி, ஜனநாயக நெறிப்படி, உண்மைப்படி பெரியார் மய்யத்தைக் கட்டித் தர வேண்டும் என்று சொன்னால் மிக அமைதியாக, மிகப் பொறுமையாக, சட்டரீதியாக நாம் ஒரு காரியத்தைச் செய்வோம். டில்லிக்குச் சென்று பெரியார் மய்யத்தைக் கட்டி முடிப்பதற்கு _ கரசேவை செய்வதற்கு நாமே ஆரம்பித்துவிடுவோம்.
நம்பிக்கை என்பதைப்பற்றி பேசு-கின்றீர்கள். அப்படியானால் கோடிக்-கணக்கான மக்களுக்குப் பெரியார் அவர்களும் ஓர் நம்பிக்கை தானே? ஆகையினாலே பெரியார் மய்யம் கட்டும் கரசேவையைத் தொடங்கும் பொழுது முதல் கரசேவை யார் செய்வார்கள் என்று சொன்னால், நான்தான் அந்த முதல் கரசேவையைச் செய்வேன்.

இப்படி இருந்த கட்டடத்தை (கட்டடத்தின் முன்பு இருந்த தோற்றப் புகைப்படம்) இப்படி ஆக்கிவிட்டார்கள். நாம் இப்படி இருக்கின்ற (கட்டடம் இடிந்துபோன நிலையில் உள்ளதை) இடத்தை மீண்டும் இப்படி ஆக்கிக் காட்டுவோம். இதில் நாம் உறுதியாக இருப்போம். இடிக்கப்படாத பெரியார் மய்யக் கட்டடத்தையும் இடிக்கப்பட்ட கட்டடத்தின் படத்தையும் பொது மக்களிடம் காட்டிப் பேசினார்.
பயங்கர வன்முறை என்று சொல்லக்-கூடியது பாம் நொலியில் உள்ள கட்டடத்தை மட்டுமே தரை மட்டமாக்கக் கூடியது. ஆனால் மத பயங்கரவாதம் என்பது ஒரு மனிதனின் இதயத்தையே தாக்கி அழிக்கக் கூடியதாகும்.
பயங்கரவாதம் என்ற குண்டுகளை வைத்து எதையும் நாம் முடித்துவிட முடியாது. ஆனால் கருத்துகளை வைத்துத்தான் ஒரு தீர்வு காண முடியும். இப்பொழுது மதத்தின் பெயராலே நாம் ரத்தத்தைச் சிந்திக் கொண்டிருக்கின்றோம்.

இந்த நிலையிலிருந்து நம்மைக் காப்-பாற்றக் கூடியது எது என்று சொன்னால் தந்தை பெரியார் அவர்களுடைய கொள்கை ஒன்றுதான் நம்மைக் காப்பாற்றும்.
நான் தமிழகத்து மக்களைப் பாராட்ட விரும்புகிறேன். டில்லி பெரியார் மய்யம் இடிக்கப்பட்டுவிட்டது. இவ்வளவு காரியங்கள் நடந்துவிட்டன. ஆனால் நீங்கள் ஆத்திரப்படவில்லை. நீங்கள் அமைதியாகச் சிந்தித்தீர்கள். என்ன நடவடிக்கை எடுக்க வேண்டுமோ அந்த நடவடிக்கைகளை முறையாக ஒழுங்காக எடுத்திருக்கின்றீர்கள். அரசாங்கமே இடித்த தவறை திருத்திக் கொள்ளட்டும் என்று சொல்லக்கூடிய வகையிலே நீங்கள் காரியம் செய்து கொண்டிருக்கின்றீர்கள்.
மதத் தீவிரவாதத்தைப் பற்றி உறுதியாக ஒரு நிலையைச் செய்து கொண்டிருக்கின்றீர்கள். அதற்காக தமிழக மக்களை நான்
பாராட்டுகின்றேன்.

கட்டடத்தைக் கட்டுவது என்பது ஒரு காரியம். ஆனால் அதுவே முடிந்த முடிவான காரியமல்ல. அதற்கு மேலாக கருத்து இருக்கிறது. அதற்கு மேலாக
மனிதாபிமானம் என்ற நீண்ட தொலை நோக்குப் பார்வை இருக்கிறது.
நான் இங்கே ஒரு மகிழ்ச்சியான செய்தியைச் சொல்ல விரும்புகிறேன்.
டில்லி பெரியார் மய்யக் கட்டடத்தை இடித்துவிட்டாலும்கூட, வீரமணி அவர்கள் ஓர் ஏற்பாடு செய்திருக்கிறார்கள். அதே பாம்நொலி கிராமத்திலே ஏழை -_ எளிய மக்களுக்காக டில்லி பெரியார் மய்யம் எந்தப் பணியைச் செய்து கொண்டி
ருந்ததோ அந்தப் பணியை இன்றைக்கும் அங்கு தொடர்ந்து நடக்குமாறு செய்திருக்கிறார்கள். ஆகையினாலே அப்படிப்பட்ட காரியத்-தைச் செய்த வீரமணி அவர்களை நான் பாராட்டுகின்றேன். எனக்களித்த வாய்ப்புக்கு நன்றி கூறி முடித்துக் கொள்கின்றேன். இவ்வாறு வி.பி.சிங் உரையாற்றினார்.

இந்திய தேசிய லீக் தலைவர் அப்துல் லத்தீப் அவர்கள் மறைவுற்ற செய்தி என்னை அதிர்ச்சிக்கும் கவலைக்கும் உள்ளாக்கியது. அவரது உடல்
அவரது இல்லத்திற்கு 17.12.2001 அன்று காலை 10:15 மணிக்கு கொண்டு செல்லப்பட்டது. செய்தியறிந்து உடனடியாக காலை 10:30 மணிக்கு லத்தீப் உடல் வைக்கப்பட்டிருந்த அவரது இல்லத்துக்குச் சென்று அவரது உடலைப் பார்த்து, தாங்க முடியாத துக்கத்துடன் கண்ணீர் சிந்தியபடி அவரது உடலுக்கு இறுதி மரியாதை செலுத்தினோம்.
அதையொட்டி, Òஇந்திய தேசிய லீக் கட்சியின் தமிழ்நாடு தலைவரும், வாணியம்பாடி தொகுதி சட்டப்பேரவை உறுப்பினரும், நீங்காத பெரியார் பற்றாளருமான பன்மொழிப் புலவர் மானமிகு அப்துல் லத்தீப் அவர்கள் இன்று காலை 7:30 மணியளவில் சென்னை பொது மருத்துவமனையில் காலமானார் என்ற செய்தி நமக்கு இடி விழுந்ததைப்போல இப்போதுதான் (காலை 9:50 மணிக்கு) கிடைத்தது.

நமது கழகக் குடும்பத்தில் முக்கியமான ஒருவரை இழந்து துடிக்கும் உணர்வு நம்மை மாளாத் துயரத்தில் தள்ளுகிறது!
அவருடன் நமக்குள்ள சகோதர பாசம் 30 ஆண்டுகளுக்கு மேற்பட்டது.
கடைசியாக அவர் கலந்துகொண்டு சிங்கம்போல் சைதையில் வி.பி. சிங் அவரின்முன், பெரியார் மய்யம் இடிக்கப்-பட்டதைக் கண்டு வேதனையுடன் முழங்கினார்.
அநீதியை எதிர்த்துப் போர் முழக்கம் செய்தபோது அவரது உடல் நலமில்லை என்றாலும்கூட, கடமையாற்றிடத் துடித்த நிலையிலேயே அவர் அந்த நிகழ்ச்சியைத் தவிர்க்க விரும்பாமல் வந்தார்.
பண்புடனும், பாசத்துடனும் எப்போதும் நம்மிடம் பழகுபவர்.

இஸ்லாமிய சமூகத்திற்கு மட்டும் அவர் தலைவர் அல்ல: திராவிடத்தின் தீரமிக்கத் தலைவர்களில் ஒருவர்.
அவரது பேரிழப்பால் தமிழ்நாட்டில் பொதுவாழ்வில் ஏற்பட்டுள்ள பள்ளம் எளிதில் எவராலும் நிரப்பப்பட முடியாத ஒன்று.
திராவிடர் கழகம் அவருக்கு தனது வீர வணக்கத்தைத் தெரிவித்துக்கொள்கிறது.
அவர்தம் குடும்பத்தினர், இஸ்லாமிய சமூகத்தினர் ஆகிய அனைவரது துயரத்தில் பங்குகொண்டு ஆழ்ந்த இரங்கலை தெரிவித்துக்கொள்கிறோம் என்று அறிக்கை வெளியிட்டோம்.

முன்னாள் பிரதமர் வி.பி.சிங் அவர்கள் தலைமையில் தூதுக்குழு 20.12.2001 மதியம் பிரதமரை அவரது இல்லத்தில் சந்தித்து பெரியார் மய்யம் சட்ட விரோதமாக- நியாய விரோதமாக இடிக்கப்பட்டதை எடுத்து விளக்கி, அது உருவாக்கப்பட அரசு உதவிட வேண்டும் என்று மனு
அளிக்கப்பட்டு வேண்டுகோளும் வைக்கப்பட்டது.
மாண்புமிகு இந்தியப் பிரதமருக்கு அளிக்கப்பட்ட கோரிக்கை மனுவில் கையொப்பமிட்டவர்கள்:
1. திரு.வி.பி.சிங், முன்னாள் பிரதமர்
2. திரு. கான்சிராம், செயல் தலைவர், பகுஜன் சமாஜ் கட்சி
3. திரு டி. ராஜா, இந்திய கம்யூனிஸ்ட் கட்சி
4. திரு சந்திரஜித் யாதவ், முன்னாள் மத்திய அமைச்சர்- சமூகநீதி மய்யத் தலைவர்
5. திரு.கே.ஆர். கணேஷ், முன்னாள் மத்திய அமைச்சர்
6. திரு.கே. எர்ரன் நாயுடு, முன்னாள் மத்திய அமைச்சர்- நாடாளுமன்ற தெலுங்கு தேசக் கட்சி தலைவர்.
7. திரு.பி.எச். பாண்டியன், நாடாளுமன்ற அ.இ.அ.தி.மு.க. கட்சித் தலைவர்
8. திரு.எஸ்.எஸ். சந்திரன், அ.இ.அ.தி.மு.க. மாநிலங்களவை உறுப்பினர்
9. கே. மலைச்சாமி, நாடாளுமன்ற அ.இ.அ.தி.மு.க. மாநிலங்களவை உறுப்பினர்
10. திரு. சோமநாத் சட்டர்ஜி, நாடாளுமன்ற மார்க்சிஸ்ட், கம்யூனிஸ்ட் கட்சித் தலைவர்
11. திரு. வைகோ, நாடாளுமன்ற ம.தி.மு.க. தலைவர்
12. திரு. இரா. செழியன், முன்னாள் நாடாளுமன்ற உறுப்பினர்
13. திரு. கா. ஜெகவீரபாண்டியன், தலைவர், சமூகநீதிக் கட்சி.
14. திரு. கி.வீரமணி, செயலாளர், பெரியார் சுயமரியாதைப் பிரச்சார நிறுவனம்(பெரியார் அறக்கட்டளை).

சென்னை பெரியார் மய்யம்வி.பி.சிங் திறப்பு!

அய்யாவின் அடிச்சுவட்டில்…இயக்க வரலாறான தன் வரலாறு (303)

2022 அய்யாவின் அடிச்சுவட்டில் நவம்பர் 1-15 2022

November 1, 2022உண்மை

(கட்டுரையின் ஒரு பகுதி)

சென்னை பெரியார் மய்யம்
வி.பி.சிங் திறப்பு!
கி.வீரமணி

சென்னை, பெரியார் மய்யம், நடிகவேள் எம்.ஆர்.ராதா மன்றம் திறப்பு விழா 28.1.2001 அன்று சென்னை பெரியார் திடலில் வரலாற்றுச் சிறப்புடன் நடைபெற்றது. விழாவையொட்டி பெரியார் திடலிலும், வெளிப்புறத்திலும் கழகக் கொடிகள்!
புதிய கட்டடம் மிக்க பொலிவாக, கம்பீரமாகக் காட்சி அளித்தது. காலை முதலே கழகக் குடும்பத்தினரும், பொதுமக்களும் கட்டடத்தை வந்து பார்த்த வண்ணமாகவே இருந்தனர்.

மும்பையிலிருந்து விமானத்தின்மூலம் 9:10 மணிக்கு சென்னை வந்த சமூகநீதிக் காவலர் மாண்புமிகு வி.பி.சிங் அவர்களை கழகப் பொருளாளர் வழக்குரைஞர் கோ.சாமிதுரை அவர்கள் தலைமையில் கழகத் தோழர்கள் வரவேற்றனர். கழகப் பொருளாளர் வி.பி.சிங் அவர்களுக்குச் சால்வை அணிவித்தார். மாநில மகளிரணிச் செயலாளர் க.பார்வதி சால்வை அணிவித்தார்.
சமூகநீதிக் கட்சியின் தலைவர் கா.ஜெகவீரபாண்டியன், மதச்சார்பற்ற ஜனதா தலைவர் ஜி.ஏ.வடிவேலு ஆகியோரும் சால்வை அணிவித்தனர். கழக மகளிரணியினரும், தோழர்களும் பெரும் அளவில் திரண்டு கழகக் கொடி அசைத்து வரவேற்றனர். கருநாடக மாநிலக் கழகத் தோழர்களும் திரண்டிருந்தனர். அனைவருக்கும் தனித்தனியே கை கொடுத்து தன் அன்பினை சமூகநீதிக் காவலர் வி.பி.சிங் அவர்கள் வெளிப்படுத்தினார்.

காலை 11:00 மணியளவில் மேனாள் பிரதமர் வி.பி.சிங் அவர்களும் தலைவர்களும் பெரியார் திடலுக்கு வந்தனர். அவர்களுக்கு பெரியார் சுயமரியாதைப் பிரச்சார நிறுவனத்தின் செயலாளர் என்ற முறையில் பூங்கொத்து அளித்து வரவேற்றேன்.
பின்னர் தந்தை பெரியார் நினைவிடத்திற்கு வி.பி.சிங் அவர்களும் தலைவர்களும் சென்று மலர்வளையம் வைத்து மரியாதை செலுத்தியபின், புதிய கட்டடத்தின் முகப்பிற்கு வந்தனர். தலைவர்கள் புடைசூழ திறப்பு விழாவுக்கான கல்வெட்டினை மேனாள் பிரதமர் வி.பி.சிங் அவர்கள் திறந்து வைத்து, அதன் பின்னர் ரிப்பனைக் கத்தரித்து மய்யத்தையும், மன்றத்தையும் திறந்து வைத்தார்.
“தந்தை பெரியார் வாழ்க’’ என்று மக்கள் உணர்ச்சி முழக்கமிட்டனர். தலைவர்கள் அனைவரும் மேடைக்கு வந்தனர். திராவிடர் கழகப் பொருளாளர் வழக்குரைஞர் 

முதலில் நான் அறிமுக உரையாற்றினேன். சென்னை -_ பெரியார் திடலில் 28.1.2001 அன்று நடைபெற்ற பெரியார் மய்யம், எம்.ஆர்.ராதா மன்றத் திறப்பு விழா நாள், இந்த இயக்கத்தினுடைய வரலாற்றில் இது ஒரு முக்கிய நாள். இந்த மன்றத்திற்கு 1962ஆம் ஆண்டிலே அறிவாசான் தலைவர் தந்தை பெரியார் அவர்களாலே அடிக்கல் நாட்டப்பட்டது. பிறகு 1963ஆம் ஆண்டிலே அன்றைய சபாநாயகர் (எஸ்.செல்லபாண்டியன்) அவர்களாலே திறந்து வைக்கப்பட்டது இம்மன்றம்.
இந்த மன்றம் இன்றைக்குப் புதுப்பிக்கப்-பட்டிருக்-கின்றது. சென்னை _ வேப்பேரி என்பது நகரின் மய்யமான இடம். இந்த மன்றத்தைப் பொறுத்த வரையில் இதிலே எவ்வளவு பெரிய வாய்ப்புகள் இருக்கின்றன என்பதை எண்ணிப் பார்க்க வேண்டும். அதை மட்டும் சுருக்கமாகச் சொல்லுகின்றேன். இதிலே அடித்தளம் உள்ளது. 7,800 சதுரஅடி கொண்டது. உணவகப் பகுதி 7,800 சதுர அடி கொண்டது. கீழே திருமணங்கள் நடைபெற்றால் ஒரு பகுதியில் 400 பேர் ஒரே நேரத்தில் உட்கார்ந்து உணவு உட்கொள்ளலாம். இப்படிப்பட்ட வசதியை அடித்தளத்தில் செய்திருக்கின்றோம். திருமணங்களுக்கு இந்த மண்டபம் பயன்படும். மாநாடுகளுக்கு இந்த மண்டபம் பயன்படும்.
எல்.சி.டி. புரொஜெக்டர் என்ற நவீன வசதியை இங்கே அமைத்திருக்கின்றோம். நவீன வசதியுடன் எம்.ஆர்.ராதா மன்றம் 14 ஆயிரம் சதுர அடி கொண்டது.

பால்கனி பகுதி மேலே இருக்கிறது. அதிலே 250 பேர் அமரக்கூடிய வசதியான இருக்கைகள் கொண்ட அமைப்பு அமைக்கப்பட்டுள்ளது. இதன் பரப்பளவு 5,500 சதுரஅடியாகும். அதேபோல இதற்கெல்லாம் தனியாக இயங்கக் கூடிய அலுவலகங்கள் ஏற்பாடு செய்யப்பட்டிருக்கின்றன. அந்தப் பகுதி 930 சதுர அடி கொண்டது.
அதோடு இந்த மன்றத்திற்குப் பின்னாலே நவீன சமையலறை அமைக்கப்பட்டிருக்கின்றது. நவீன சமையலறைக் கருவிகள் பொருத்தப்பட்ட சமையல் கூடமாகப் பின்னாலே அமைக்கப்-பட்டிருக்கின்றது. சென்னையிலே திருமணம் நடத்தக்கூடியவர்களுக்கு ஒரு வசதிக் குறைவு இருக்கிறது. சில திருமண மண்டபங்களிலே காய்கறி சமையலுக்கு மாத்திரம்தான் அனுமதி உண்டு. புலால் வகை சமையலுக்கு அங்கு அனுமதி கிடையாது. கறி, பிரியாணி செய்யக் கூடியவர்களுக்கு வாய்ப்பில்லை என்று சொல்லக்-கூடிய திருமண மண்டபங்கள் உண்டு. புலால் உணவு சமைப்பவர்களுக்கு மண்டபம் இல்லை என்று கொடுக்க மறுக்கிறார்கள்.

பெரியார் திடலில் உள்ள இம் மண்டபத்தில் சைவ, அசைவ உணவு இவை இரண்டிற்கும் வாய்ப்புண்டு என்பதைத் தெரிவித்துக் கொள்கின்றோம். ஒரு பக்கம் தனியாக சைவ உணவு தயாரிக்கும் இடம் இருக்கிறது. இன்னொரு பக்கம் அசைவ உணவுக் கூடம் என்று தனியாக ஏற்பாடு செய்யப்பட்டிருக்கின்றது இது 3000 சதுர அடி கொண்டது.
இந்த நேரத்தில் இவ்வளவு பெரிய மண்டபத்தை சிறப்பாக அமைத்து இரவு, பகல் என்று பாராமல் உழைத்த தோழர்கள் இங்கே பாராட்டப்பட்டார்கள். இதிலே எங்களுக்கு என்ன மகிழ்ச்சி என்று சொன்னால் தந்தை பெரியார் அவர்கள் உருவாக்கிய மண்டபம் மாற்றப்பட்டிருக்கிறது. காலத்தை ஒட்டி இதிலே வசதிகள் செய்யப்பட்டிருக்கின்றன.
இந்த மேடையிலே வீற்றிருக்கின்ற மதிப்பிற்குரிய முன்னாள் பிரதமர் வி.பி.சிங் அவர்கள், தமிழ் மாநில காங்கிரஸ் கட்சித் தலைவர் அய்யா மூப்பனார் அவர்கள் மற்றும் இங்கு வந்திருக்கின்ற தலைவர்கள் எல்லாம் நாங்கள் நடத்துகின்ற ஒவ்வொரு நிகழ்ச்சிக்கும் ஊக்கமும், உற்சாகமும் கொடுக்கின்ற காரணத்தால் இந்த மன்றத் திறப்பு விழா என்று சொன்னாலும், இது மக்களுக்கு அர்ப்பணிப்பு விழா என்ற அளவிலே இந்த நிகழ்ச்சி இன்றைக்கு மகிழ்ச்சியுடன் நடைபெற்றுக் கொண்டிருக்கின்றது.

இது யாருடைய தனிப்பட்ட சொத்தும் அல்ல. இது மக்களுடைய சொத்து என்பதைத் தெளிவாக உணர்ந்தவர்கள் நாங்கள். இதைப் பாதுகாக்கக் கடமைப்பட்டவர்கள்.
ஆனால், இந்தக் கட்டடத்தைக் கட்டி முடித்தது பெரியார் _ மணியம்மை மகளிர் பொறியியல் கல்லூரியினுடைய பேராசிரியர்கள் என்பதைப் பெருமையோடு சொல்லுகின்றோம்.
வாடிக்கையாளர்களுக்கு ஒரு மகிழ்ச்சியான செய்தியைச் சொல்லுகின்றோம். நகரத்திலேயே ஒப்பிட்டுப் பார்க்கும்பொழுது இவ்வளவு குறைவான வாடகை உள்ள நடுத்தரமான மன்றம் வேறு இல்லை என்று சொல்லக்கூடிய அளவிற்கு அந்த வாடகை இருக்கும் என்பதைத் தெரிவித்துக் கொள்கிறேன்.

இந்தப் பெருமைக்கு என்ன காரணம் என்று சொன்னால் இது ஒரு கூட்டுக் குழு மனப்பான்மையோடு சிறப்பாக எல்லோரும் பங்களித்திருக்கின்றார்கள். அவர்கள் எல்லோருக்கும் இந்த நேரத்திலே நன்றி தெரிவித்துக் கொள்கின்றேன்.
மதிப்பிற்குரிய முன்னாள் பிரதமர் வி.பி.சிங் அவர்களே! நீங்கள் என்றும் எங்களுடன் இருக்கக்கூடியவர்கள். உங்களிடமிருந்து வஞ்சகர்கள் பதவியைப் பறித்துக்கொள்ளலாம். பதவி இல்லாததையே நீங்கள் ஒரு மகிழ்வாக எடுத்துக் கொண்டிருக்கின்றீர்கள். எதைப் பெறுவதாக இருந்தாலும் அதற்கு ஒரு நல்ல விலையைக் கொடுத்தாக வேண்டும். மண்டல் அறிக்கையை அமல்படுத்தி நாட்டு மக்களுக்கு வேலை வாய்ப்புக் கிடைக்கின்ற நற்காரியத்தைச் செய்திருக்கின்றீர்கள். ஒரு நல்ல விலையைக் கொடுத்திருக்கின்றீர்கள்.
மக்கள் ஒருபோதும் உங்களை மறக்க மாட்டார்கள். மக்களுடைய இதயங்களில் உங்களுடைய சமூகநீதிச் சாதனையால் இடம் பெற்றுவிட்டீர்கள். உங்களுடைய செயல் சரித்திரப் பொன்னேட்டில் பொறிக்கப்படும்.

நாடாளுமன்றத்தில் தந்தை பெரியார் பெயரை முழங்கிய முதல் இந்தியப் பிரதமர் நீங்கள் என்ற பெருமை என்றைக்கும் அழிக்க முடியாத, எல்லோர் மனதிலும் இடம் பெறக்கூடிய ஒன்றாகும். பெரியார் பெயரை உச்சரித்த பின்தான் மண்டல் கமிஷனை அமல்படுத்தினீர்கள்.
பெரியார் ஒருபோதும் நாடாளு மன்றத்திற்குள் நுழைந்ததில்லை. நீங்கள் பெரியாரை நாடாளுமன்றத்திற்குள் அழைத்துச் சென்றிருக்கின்றீர்கள். நாடாளுமன்றக் குறிப்பில் பெரியார் இருக்கிறார். உங்களை இந்த விழாவிற்கு அழைத்தது மிகுந்த பொருத்தமான ஒன்று என்பதை இந்த நேரத்திலே எல்லோர் சார்பாகவும் பெருமகிழ்வுடன் தெரிவித்துக் கொள்கின்றோம்.

தொடர்ந்து சமூகநீதிக் கட்சித் தலைவர் கா.ஜெகவீரபாண்டியன், பிரபல திரைப்பட இயக்குநர் வேலு.பிரபாகரன், மதச்சார்பற்ற ஜனதா தள தலைவர் ஜி.ஏ.வடிவேலு, நடிகவேள் ராதா அவர்களின் மகன் எம்.ஆர்.ராதாரவி, மார்க்சிஸ்ட் கட்சியின் மத்திய நிருவாகக் குழு உறுப்பினர் என்.வரதராஜன், இந்திய கம்யூனிஸ்ட் கட்சியின் தமிழ் மாநில செயலாளர் ஆர்.நல்லகண்ணு, மக்கள் தலைவர் ஜி.கே.மூப்பனார் ஆகியோர் உரையாற்றினர்.
நிறைவாக, மேனாள் பிரதமர் வி.பி.சிங் சிறப்புரையாற்றினார். பேராசிரியர் கு.வெ.கி.ஆசான் அவரது ஆங்கில உரையைத் தமிழாக்கித் தந்தார்.
(நினைவுகள் நீளும்…)

அய்யாவின் அடிச்சுவட்டில்…இயக்க வரலாறான தன் வரலாறு (304)

2022 அய்யாவின் அடிச்சுவட்டில் நவம்பர் 16-30 2022

November 17, 2022உண்மை

மேனாள் பிரதமர் வி.பி.சிங் ஆற்றிய உரை…
– கி.வீரமணி

“இந்த அரங்கத்திற்கு, மிகச் சிறந்த கலைஞரான எம்.ஆர்.ராதாவின் பெயர் வைக்கப்
பட்டுள்ளது. தன் வாழ்நாள் முழுவதும் சமூக சீர்திருத்தக் கருத்துகளைப் பரப்பவதையே கடமையாகக் கொண்டிருந்த அவருடைய பெயர் இந்த அரங்கத்திற்கு வைக்கப்பட்டிருப்பது பொருத்தமானதே ஆகும்.
தந்தை பெரியார் தமது வாழ்நாளெல்லாம் சமூக நீதிக்காகப் பாடுபட்டவர். சமூகச் சீர்திருத்-தங்களுக்காகவும் சமூக நீதிக்காகவும் எடுத்துக் கொண்ட முயற்சிகளால் அவர் துன்பங்களுக்கும் அவமானங்களுக்கும் உள்ளாக்கப்பட்டார். அவர் அனுபவித்த துன்பங்களாலும் அவர் செய்த தியாகங்களாலும் இன்று சமூக நீதித்திட்டங்களை நடைமுறைப்படுத்துவதில் தமிழ்நாடு ஒரு முன்னோடி மாநிலமாக, ஒரு சிறந்த முன்மாதிரி மாநிலமாக விளங்குகிறது. நம்முடைய சமுதாயம் பலவகையான பிரிவுகளையும் ஏற்றத் தாழ்வுகளையும் உடையதாகும்.
இந்த உன்னதமான சமுதாயத்தில் சிலர்
மதிக்கப்படுகின்றனர். சிலர் வெறுக்கப்படு-கின்றனர்.

எங்கெல்லாம் ஏற்றத் தாழ்வுகள் இருக்கின்றனவோ, அங்கெல்லாம் அரசியல், பொருளாதாரம், சமுதாயம் உள்பட எல்லா நிலைகளிலும் மக்களாட்சித் தத்துவம் சிதைந்து போகிறது. தந்தை பெரியார் சமுதாயத்தில் ஏகபோக நிலைக்கு எதிராகப் போராடினார். இன்று நம் தோழரான திரு.வீரமணி இந்தப் போராட்டத்தை தொடருவது மட்டுமல்லாமல், ஒத்த கொள்கையுடையவர்களின் துணையுடன் அந்தப் போராட்டத்தின் எல்லையை விரிவுபடுத்தியும் இருக்கிறார். மக்கள் ஒடுக்கப்பட்டு, நசுக்கப்பட்ட நிலையில் உள்ளனர். இதன் காரணம் என்ன? அவர்கள் சங்கிலிகளால் கட்டப்பட்டுள்ளனர். இந்தச் சங்கிலிகள் அவர்களுடைய கைகளிலோ, கால்களிலோ கட்டப்படவில்லை; அவர்களுடைய மூளையில், மனதில் கட்டப்பட்டுள்ளது. வாழ்க்கையிலுள்ள துன்பங்களுக்கு முற்பிறப்பில் ஒருவர் செய்த பாவச் செயல்களே காரணம் என்னும் மூடநம்பிக்கை உள்பட கருமம், முற்பிறப்பு, அடுத்த பிறவி போன்ற பல மூடநம்பிக்கைகளாலான சங்கிலிகளால் அவர்களுடைய மூளை கட்டப்பட்டுள்ளது. மனிதனுக்கும் மனிதனுக்கும் இடையில் இப்படிப்பட்ட பாரபட்சங்களும் சுரண்டல்களும் இயற்கையானவை அல்ல. அவை மனிதனால் ஏற்படுத்தப்பட்டவைகளே.
தன்னுடைய துன்பங்கள் அனைத்திற்கும் முற்பிறப்பில் தான் செய்த செயல்களே காரணம் என்றும், வேறு யாரும் அதற்குப் பொறுப்பல்ல என்றும் மனிதன் எண்ணுகின்றான். இந்த நாட்டில் மக்கள் அந்த அளவிற்கு மூளைச் சலவை செய்யப்பட்டு விட்டனர். இந்த மனோவியல் ரீதியிலான அடிமைத்தனச் சங்கிலிகளை நாம் அணிந்திருக்கும் நகைகள்
என்பது போன்றே நாம் எண்ணத் துவங்கி-விட்டோம்.

இந்த அடிமைத்தனத்திலிருந்து விடுபட ஒரு புரட்சி வந்தாக வேண்டும். அந்தப் புரட்சி கூட நமக்குள் இருந்துதான் வர வேண்டும். அது மக்களால் மட்டுமே, நம்மால் மட்டுமே செய்யப்படக் கூடியது. தந்தை பெரியாரின் முக்கியப் பங்களிப்பு என்னவென்றால், அவர் தமது சுயமரியாதை இயக்கத்தின் மூலமாக இந்தப் புரட்சியை மக்களின் மனங்களில் உருவாக்கிவிட்டார். மனிதனுக்குச் சுயமரியாதை இல்லாமற்போனால் அவன் மனிதனாகவே இருக்க முடியாது. ஓர் இயந்திரமாகத்தான் இருக்க முடியும். அதனுடைய முகத்தில் துப்பினாலும் கூட அது எந்த அவமானத்தையும் உணராது. அதைப்போலவே, பல நூற்றாண்டுகளாக எந்த ஒரு சுயமரியாதையும் இல்லாமல் மக்கள் இயந்திரங்களைப் போல் வாழ்ந்து வந்தார்கள்.

தந்தை பெரியாரின் சமூக நீதி இலக்கை நாம் அடைந்தால் மட்டும்தான் நாம் அரசியலிலும் பொருளாதாரத்திலும் முன்னேற்றமடைய முடியும். சுயமரியாதையின் அடிப்படையில்தான் இந்தச் சமூக மாற்றம் நடைபெற முடியும். அதைத்தான் தந்தை பெரியார் செய்தார்; அதைத்தான் திரு.வீரமணியும் அவரது தொண்டர்களும் இப்போது செய்துகொண்டு இருக்கிறார்கள்.
மண்டல் ஆணையப் பரிந்துரைகள் நடைமுறைப்படுத்தப்பட்டதன் காரணமாக நாம் வளர்ச்சியடையவும் ஏற்றம் பெறவும் பல வழிகள் திறந்துள்ளன.

நாம் பின்தங்கியவர்கள் ஆக்கப்பட்டதினால் நம் வாய்ப்புகள் நம்மிடமிருந்து பறிக்கப்-படலாமா என்ற கேள்வியை நாம் எழுப்பினோம். இப்போது நாம் ஒரு எரிமலையின் உச்சியில் அமர்ந்துள்ளோம். நம் நாட்டின் மக்களில் கிட்டதட்ட 80 விழுக்காடு பேர் தம் உரிமைகளுக்காகப் போராடுகின்றனர். எரிமலையின் வாய் பனிக்கட்டிகளால் மூடப்பட்டிருந்தாலும், அது எந்த நேரமும் வெடித்துச் சிதறும் நிலையில் தான் உள்ளது.

தந்தை பெரியார் மற்றும்
அண்ணல் அம்பேத்கரின் கருத்துரு
நான் அவர்களுடைய விருப்பங்களை நிறை
வேற்றியுள்ளேன். ஆயிரக்கணக்கான ஆண்டு
களாக ஒடுக்கப்பட்ட மக்களுக்கு இருந்த லட்சியங்களையும் கனவுகளையும் என் உத்தரவுகளின் மூலம் நனவாக்கியுள்ளேன். எனவே, இனி அவற்றை யாராலும் அகற்றிவிட முடியாது.

இப்போதெல்லாம் அனைத்துக் கட்சிகளும் மண்டல் ஆணைய உத்தரவுகளைக் குறித்துப் பேசுகின்றன. நீங்கள் ஏன் இப்போது என்னிடம் மண்டல் ஆணையம் குறித்துக் கேட்க வேண்டும்? இனி புதிதாக ஆட்சிக்கு வருபவர்களைக் கொண்டு நீங்களே அதைச் செய்துகொள்ள முடியும் என்று நான் உங்களுக்குச் சொல்லிக் கொள்கிறேன்.
இனி அதிகாரத்திற்கு வருபவர்கள் தேவையானதைச் செய்வார்கள். மண்டல் ஆணையத்தின் பரிந்துரைகளை நாங்கள் நடைமுறைப்படுத்தி விட்டோம். இந்தப் பணியை நாங்கள் வெற்றிகரமாகச் செய்திருக்கிறோம். அது ஒரு போர்க்களமாக இருந்தது. நாம் அதில் வெற்றிபெற்றுள்ளோம். அதைக்குறித்து மேற்கொண்டு நாம் எதுவும் எண்ண வேண்டியது இல்லை; அடுத்த அடியைத்தான் நாம் எடுத்து வைக்க வேண்டும். அடுத்த கட்டம், மக்களுக்கு விழிப்புணர்வு ஏற்படுத்துவதுதான், சரியான முறையில் மக்களுக்கு அறிவூட்டுவது அவசியமாகும்.
ஆகவே, சராசரி மனிதர்கள் இந்த வகையான கல்வியைப் பெற இயலாத நிலையில் உள்ளனர். கல்வியின் வணிக மயமாக்கல், பண வசதி உடையவர்களுக்கு மட்டுமே இந்த வகைக் கல்வியைப் பெறும் வாய்ப்பு கிடைக்கும் நிலையை ஏற்படுத்தியுள்ளது. பொதுமக்கள் இந்த வகைக் கல்வியைப் பெறும் வாய்ப்பு மறுக்கப்பட்டுள்ளது.

நான் மண்டல் ஆணையப் பரிந்துரைகளை நடைமுறைப்படுத்தியபோது என்னிடம் ஒரு கேள்வி கேட்கப்பட்டது. தனித்திறமை பெற்ற மக்களின் தலைவிதி இனி என்னவாகும்? என்பதே அது. தனித்திறமை பெற்ற ஏழை மக்கள் இப்படிப்பட்ட கல்வியைப் பெற முடியாது என்று என்னிடம் வாதிட்டனர். ஆனால் இன்றும் கூட அப்படிப்பட்ட கல்விக்கான கட்டணம் மிகவும் அதிகமாக ஆகிவிட்டதால் தனித்திறமை பெற்ற ஏழை மக்கள் இப்படிப்பட்ட கல்வியைப் பெற முடியாத நிலை உள்ளது. ஆகவே, நாம் கல்வியை அனைவருக்கும் கிடைக்கச் செய்வது மிகவும், அவசியமாகும். கல்வி மிகவும் விலையுயர்ந்த ஒன்றாக இருக்க வேண்டியதில்லை. கல்வியானது குறைந்த செலவில் கிடைக்கக் கூடியதாகும்போது தான், விரும்பும் கல்வியைப் பெற அனைவருக்கும் சம வாய்ப்பு கிடைக்கும்; அத்துடன் சமுதாயத்தில் சமத்துவமும் நிலவும்.
குறிக்கோளுள்ள வாழ்வை நடத்த கல்வி
பயனுள்ளதாக அமையவேண்டும், இப்போதுள்ள
கல்வி முறை அதற்கேற்றதாக இல்லை.

எனவே,இப்போது நாம் பெறுகின்ற கல்வி உண்மையான கல்விதானா என்று நாம் சந்தேகப்பட வேண்டியதாகிறது.
கல்வி மற்றும் மக்கட்பணியின் அடிப்படைக் கருத்து, மனித மனத்தையும் இதயத்தையும் பயன்படுத்துவதுதான்.
ஒரு மனிதனிடம் என்ன இருக்கிறது, எவ்வளவு சொத்து இருக்கிறது என்பதை வைத்து நாம் அவனை மதிப்பது இல்லை. அவனிடம் ஒரு பங்களா மற்றும் கார் இருந்தால் அவன் ஒரு பெரிய மனிதன் ஆகிவிடுகிறான். ஆனால், ஒரு மனிதனிடம் உள்ள விழுமியங்களையும், பண்பையும் வைத்துத்தான் தந்தை பெரியார் அவனை மதிப்பிடுகிறார். அவரைப் பொறுத்த வரையில் ஒரு மனிதனின் சொத்து அல்லது சமூக அந்தஸ்தை வைத்து அவனை மதிப்பிட முடியாது; அவனுடைய மனிதத்தன்மை மற்றும் மனிதனை மனிதனாக நடத்தும் பண்பை வைத்துத்தான் மதிப்பிட முடியும்.

தந்தை பெரியாரின் லட்சியங்களை உலகம் முழுவதும் பரப்புவதற்காக நம் தோழர் திரு.கி.வீரமணி எடுக்கும் முயற்சிகளை நான் பாராட்டுகிறேன். அனைவரின் ஒத்துழைப்பு மற்றும் உதவியுடன் அவர் தமது முயற்சிகளில் வெற்றி பெற வாழ்த்துகிறேன்.” என்று தமது உரையில் வி.பி.சிங் குறிப்பிட்டார்.
பெரியார் சுயமரியாதைப் பிரச்சார நிறுவனத் தலைவர் பொத்தனூர் க.சண்முகம் இறுதியாக நன்றி கூறினார். விழா நிகழ்ச்சிகளை கழக உதவிப் பொதுச் செயலாளர் கவிஞர் கலி.பூங்குன்றன் தொகுத்து வழங்கினார். பல்லாயிரக்கணக்கான மக்கள் இந்நிகழ்ச்சியில் கலந்து கொண்டனர்.