ஏமாற்றும் கட்டுக்கதைகள் ‘‘நெருப்பும், அக்னி பகவான் பெற்ற சாபமும்’’-செ.ர.பார்த்தசாரதி

 ஏமாற்றும் கட்டுக்கதைகள் ‘‘நெருப்பும், அக்னி பகவான் பெற்ற சாபமும்’’-செ.ர.பார்த்தசாரதி

தீ(சுடர்) உண்டாக வேண்டும் என்றால் மூன்று  பொருட்கள் தேவை.

அவை

1. எரிபொருள்
2. வெப்பம்
3. உயிர்வளி (ஆக்சிஜன்) என்பன.

இந்த மூன்று பொருள்கள் ஒன்று சேர்ந்தால் தான் தீ உண்டாகும்.

எரிந்து கொண்டிருக்கும் பொருளை அணைக்க வேண்டுமானால். எரியும் பொருளின் வெப்பத்தை குறைக்க வேண்டும். அதற்காக தண்ணீர் அல்லது தண்ணீரால் நனைக்கப்பட்ட பொருள் கொண்டு அணைக்கலாம். (குளிர்விக்கும் முறை)

அடுத்தது உயிர்வளி எனப்படும் ஆக்சிஜன் கிடைப்பதை தடை செய்ய வேண்டும். தீயை மூட வேண்டும் அல்லது கரியமில வாயு (கார்பன் டை ஆக்சைடு) எனப்படும் கரியமில வளியினை படரவிட்டு அணைக்க வேண்டும். (போர்வை முறை)

பெரிய அளவில் எரிந்து கொண்டிருக்கும் போது; தீ மேலும் பரவாமல் இருக்க, பக்கத்தில் உள்ள எரிபொருளை அப்புறப்படுத்த வேண்டும். (‘தீ’க்கு பட்டினி போடும் முறை)

  பூமியில் மட்டுமே தீ

நமது புவியில் மட்டுமே எளிதில் தீ உண்டாகும். மற்ற கோள்களிலோ விண்மீன்களிலோ, பால்வெளி மண்டலங் களிலோ (கேலக்சி) கூட தீ உண்டாகாது. நம் புவியில் மட்டுமே உயிர்வளி (ஆக்சிஜன் )உள்ளது. அதனால் இங்கு எளிதில் தீ உண்டாகின்றது

அதோடு மட்டுமல்லாமல் வளிமண்டலத்தில் (காற்றில்) ஒரு குறிப்பிட்ட அளவில் உயிர்வளி இருக்க வேண்டும். அப்பொழுதுதான் தீ உண்டாகும். நமது வளிமண்டலத்தில் 20.95% உயிர்வளி உள்ளது. இது தீ உண்டாக போதுமான அளவு ஆகும்.

தற்போது உள்ள இந்த விழுக்காட்டிற்கு, அதாவது 25%க்கு மேல் உயிர் வளி இருந்தால்  தற்போதுள்ள சாதாரண வெப்பநிலையிலேயே தானாகவே தீப்பிடித்து எரியும் நிலை ஏற்பட்டுவிடும். 15%க்கு கீழ் உயிர்வளி குறைந்தால் தீ அணைந்து விடும். தீயை உண்டாக்க முடியாது.

வெப்பம் எப்படி உண்டாகிறது?

வெப்பம் உண்டாக உராய்வு மட்டுமே போதும். இரண்டு பொருள்கள் உராயும்போது வெப்பம் உண்டாகிறது. அதேபோல் பொருள்கள் வினை புரியும்போதும் உராய்வு ஏற்பட்டு வெப்பம் உண்டா கிறது.

மின் விளக்கு எரிகிறது என்று சொல்கிறோம் ஆனால் உண்மையில் மின்விளக்கு எரிவதில்லை. வெப்பத்தையும் ஒளியையும் உமிழ்கிறது.

மெழுகுவர்த்தி, எண்ணெய் விளக்கு போன்றவற்றை எரிய விட்டுக் கொண்டு இருந்த நாம், பழக்கத்தின் பேரில் மின் விளக்கையும் எரிகிறது என்கிறோம். ஒளிர்கிறது என்று தான் சொல்ல வேண்டும்.

 ‘அக்னி பகவான்’
பெற்ற சாபமாம்

சிவபெருமான் இமய மலையின் உச்சியில், தன் மனைவி பார்வதியுடன் 100 தேவ ஆண்டுகள் உல்லாசமாக இருந்து, உடலுறவு இன்பத்தில் ஈடுபட்டு வந்தானாம்; இதனிடையே அக்னி பகவான் ‘புறா’ உருவம் கொண்டு அந்த இடத்திற்கு சென்று சிவபெருமானின் லீலைகளுக்கு இடையூறு ஏற்படுத்தியதால் சிவனின் விந்து நழுவி வீணானதாம். அதனால் பார்வதிதேவி தனக்கு குழந்தை பிறக்க விடாமல் செய்த அக்னி பகவானை “அக்னி(தீ)க்கு சயரோகம் (எலும்புருக்கி நோய்) பிடித்தது போல் உடன் புகையும் ஒரு பகுதியாக சேர்ந்து வரும்.”என்று சபித்து விட்டாளாம். அதனால் தான் தீ எரியும் போது புகையும் சேர்ந்து வருகிறதாம்.  காளிதாசர் இயற்றிய ‘’குமாரசம்பவம்’’ சருக்கம் – 10இல் இந்த கதை கூறப்பட்டுள்ளது.

உண்மையில் புகை எதனால் ஏற்படுகிறது

நீரை சூடு படுத்தும் போது நீரிலிருந்து நீராவி வெளி வருகிறது. இதுவும் ஒரு வகை புகை தான். நீரில் இருந்து வெளி வருவதால் அதை நாம் வேறுபடுத்தி நீராவி என்று சொல்கிறோம்.

 ஒகேனக்கல்

தர்மபுரி மாவட்டத்தில் ஒகேனக்கல் என்று ஒரு சுற்றுலா இடம் உள்ளது. ஒகேனக்கல் என்பது கன்னட மொழி பெயர். ‘ஒகனே’ என்றால் புகை. அதாவது ‘புகையும் கல்’ என்று பொருள். கல்லின் மீது நீர் மோதி சூடாகி, புகை போன்ற ஒரு நீர்த்துளிகளை உண்டாக்குகிறது. இதைத்தான் புகை என்கின்றனர்.

நாம் நடைமுறையில் புகை என்று சொல்வதைப் பற்றி பார்ப்போம்.

பொருட்கள் எரியும் போது தொடர்வினை ஏற்படுகிறது. இதனால் தொடர்ந்து எரிகிறது. இதனால் இந்த பொருளில் உள்ள கரி, நீர் ஆகியவை ஆவி வடிவில் வெளியேறுகின்றன. அதாவது கரித்துகள், கார்பன் டை ஆக்சைடு, கார்பன் மோனாக்சைடு மற்றும் நீராவி கலந்த ஒரு பொருள் வெளியேறுகிறது இவைதான் கருநிற புகையாக தெரிகிறது.

பொருள் முழுமையாக எரிக்கப்பட்டால் புகை வருவதே தெரியாது. அரைகுறையாக எரிக்கப்படும் போது தான் புகை வருகிறது.

இந்த அறிவியல் உண்மை தெரியாத காலத்தில் மதத்தின் பெயரால் முட்டாள்தனமாக கருத்துகளை பரப்பியுள்ளனர். இதுபோன்ற கருத்துகளை மதவெறியர்கள் எப்படியாவது பாட புத்தகங்களில் சேர்த்துவிடலாம் என்று முயன்று வருகின்றனர்.

- விடுதலை ஞாயிறு மலர், 25.10.2025

பாம்புக்கும் கீரிப்பிள்ளைக்கும் சண்டை மூண்டால்…-செ.ர.பார்த்தசாரதி

பாம்புக்கும் கீரிக்கும் சண்டை விடுவதாக சொல்லி; ‘மாயாஜால வித்தை’ (தந்திரக் காட்சி) காட்டுபவர்கள், கடைசியில் பாம்புக்கும் கீரிக்கும் சண்டை விடாமலேயே மூட்டை கட்டி விடுவர்.

இது எதனால் என்றால் பாம்புக்கும் கீரிக்கும் சண்டை விட்டால், கீரி பாம்பை கொன்று விடும் அதனால்.!

பாம்புகளின் வகைகள்

பாம்புகளில் நஞ்சு உள்ளவை நஞ்சு இல்லாதவை என இரண்டு வகை உள்ளது.  அதேபோல் நஞ்சு உள்ளவைகளிலும் இரண்டு வகைகள் உள்ளன. அவை:

1.. நீயூரோ டாக்சிக்’ (Neurotoxic) உள்ளவை.  2.‘ஈமோ டாக்சிக்’(Hemotoxic) உள்ளவை. என்பனவாகும்.

நியூரோ டாக்சிக் நஞ்சு உடலின் நரம்பு மண்டலத்தைப் பாதித்து, பக்கவாதத்தை ஏற்படுத்துகிறது. அதே நேரத்தில் ‘ஈமோ டாக்சிக்’ நஞ்சு இரத்தத்தைப் பாதித்து, திசு சேதத்தை ஏற்படுத்துகிறது. இதனால் உயிரிழப்பு ஏற்படுகிறது.

நாகப்பாம்புகள், மாம்பாக்கள் மற்றும் கிரெய்ட்கள் ‘நியூரோ டாக்சிக்’ நஞ்சை கொண்டுள்ளன, அதே நேரத்தில் ‘ராட்டில் ஸ்னேக்ஸ்’ மற்றும் ‘அட்டர்ஸ்’ போன்ற விரியன் பாம்புகள் ‘ஈமோ டாக்சிக்’ நஞ்சை கொண்டுள்ளன.

கீரிப்பிள்ளையும் பாம்பும்

கீரிப்பிள்ளைக்கும் பாம்புக்கும் சண்டை மூண்டால் கீரிப்பிள்ளையே வெல்லும்.   கீரிப்பிள்ளை விரைந்து செயல்படும் ஆற்றல் கொண்டது. இதனால் பாம்பிடம் சண்டை போட்டு, போக்கு காட்டி, பாம்பை சோர்வடைய வைக்கும். கீரிப்பிள்ளை தனது உடலில் இருக்கும் மயிர்களை சிலிர்க்க வைத்து பாம்புக்கு பெரிய உடலாக காண்பிக்கும்; இதனால் பாம்பின் கடி கீரிப்பிள்ளையின் உடல் மீது பதியாமல், மயிர் பகுதியிலேயே பதியும்.  அதோடு அதன் தோல் பகுதி மிகவும் கடினமானதால், கடியும் சரியாக பதியாது. கீரிப்பிள்ளை பாம்பின் தலையை சிதைத்தும்; கழுத்தை குதறியும் கொன்றுவிடும். கீரிப்பிள்ளையின் கடி மிக வலிமை வாய்ந்தது.  அப்படியே பாம்பின் கொத்து, கீரியின் உடம்பில் பட்டு நஞ்சு பாய்ந்தாலும் பாம்பின் நஞ்சு கீரியை ஒன்றும் செய்யாது. காரணம் கீரிப்பிள்ளையின் உடம்பில் பாம்பின் நஞ்சுக்கான எதிர் புரதம் (Antibody), அதாவது மாறுபட்ட ‘அசிட்டோகோலின் ஏற்பி’ (Acetylcholine receptor) என்ற நச்சு முறிவு பொருள் (anti venom) உள்ளது. அதேபோல் கிளைக்கோ புரதம் ((Glycoprotein) என்கிற நஞ்சு எதிர்ப்பு பொருளும் உள்ளது. இந்தப் பொருள்கள் பாம்பின் நஞ்சை முறித்து விடும். இதனால் கீரிப்பிள்ளை பாம்பு கடியால் இறக்காது தப்பித்துவிடும்.   இதே போல் பாம்பு நஞ்சிற்கு எதிரான ‘புரதப் பொருள்’ உள்ள பல உயிரினங்கள் உள்ளன.

அதில் ஒன்று குதிரை. குதிரையின் காலில் பாம்பு கொத்திய பிறகு, குதிரையின் உடம்பில் பாம்பு நஞ்சுக்கு எதிரான புரதம் சுரந்து இரத்தத்தில் கலந்து விடும். இதனால் குதிரை பிழைத்து விடும்.

இதை பயன்படுத்தி குதிரையின் இரத்தத்திலிருந்து பாம்பு கடிக்கு ‘முறிவு மருந்து’ தயாரிக்கிறார்கள்.

 பாம்பு கடிக்கு மருந்து

பாம்பின் நஞ்சை சிறிய அளவில் மாற்றம் செய்து, ஊசி மூலம் குதிரைக்கு செலுத்துகிறார்கள். சில நாட்களில் குதிரையின் உடம்பில் ‘நஞ்சு முறிவு புரதம்’ சுரக்கிறது. குதிரையின் இரத்தத்தில் இருக்கக்கூடிய இந்த புரதத்தை பிரித்தெடுத்து, மனிதர்களுக்கு ஏற்படும் பாம்பு கடிக்கு மருந்தாக பயன்படுத்துகின்றனர்.

அதேபோல், கோழியின் உடலில் சிறிய அளவில் பாம்பின் நஞ்சை செலுத்தி;, அது இடும் முட்டையின் மஞ்சள் கருவைக் கொண்டு பாம்பு கடிக்கு மருந்து தயாரிக்கின்றனர். பாம்பு கடிக்கு மருந்து உயிரினத்தில் இருந்து தான் தயாரிக்கப்படுகிறது. ‘இறைச்சி உணவு’ கூடாது என்பவர்கள் (Non-Vegetarian); பாம்பு கடிக்கு பலியாக வேண்டியது தான்!

- விடுதலை ஞாயிறு மலர், 27.09.2025 

1. குதிரை மூலம் பாம்பு கடிக்கு நஞ்சு முறிவு மருந்து தயாரிக்கும் முறை

2. கோழி மூலம் பாம்பு கடிக்கு நஞ்சு முறிவு மருந்து தயாரிக்கும் முறை

ஆக்ஸ்ஃபோர்டு பல்கலை.யில் சுயமரியாதை இயக்க நூற்றாண்டு மாநாடு: ‘தினமலர்’, பா.ஜ.க. கும்பலின் புரட்டு அம்பலம்!

 viduthalai

தந்தை பெரியார் படத்தை லண்டனில் உள்ள ஆக்ஸ்போர்டு  பல்கலைக்கழகத்தில் 04.09.2025 அன்று நடக்கும் கருத்தரங்கத்தில் தமிழ்நாடு முதலமைச்சர் மு.க.ஸ்டாலின் சிறப்புரையாற்றி திறந்து வைக்கிறார்.

இது குறித்து  ‘‘ரூ.25,000 வாடகை செலுத்தி ஈ.வெ.ரா. படத் திறப்பு’’ என்ற தலைப்பில் தினமலர் வெளியிட்டுள்ள செய்தி  கீழே தரப்பட்டுள்ளது.

‘‘ஆக்ஸ்போர்டு பல்கலையில், ஈ.வெ.ராமசாமி படத்திறப்பு என முதல்வர் ஸ்டாலினின் அறிவிப்பை கண்டதும், அப்பல்கலை. பி.ஆர்.ஓ., மற்றும் நண்பர்களிடம் விசாரித்தேன். ‘ஆக்ஸ்போர்டு’ பல்கலை அதிகாரப்பூர்வமாக முதல்வர் ஸ்டாலினை அழைக்கவில்லை; ஈ.வெ.ராமசாமி படத்திறப்பும் இல்லை’’ என தெரிவித்தது. ஆக்ஸ்போர்டு பல்கலை வளாகத்தில் கருத்தரங்கம் நடத்த, சிறிய அரங்குகள், 210 பவுண்டுக்கு வாடகைக்கு கிடைக்கும்.

அப்படி சிறிய அரங்குகளை வாடகைக்கு எடுத்து யார் வேண்டுமானாலும் நிகழ்ச்சி நடத்தலாம். முதல்வர் ஸ்டாலின் பிரிட்டன் வருவதால், தி.மு.க.,வினர் ஆக்ஸ்போர்டு பல்கலை வளாகத்தில், சிறிய அரங்கை வாடகைக்கு எடுத்துள்ளனர். அதில் தான் ஈ.வெ.ராமசாமி படத்தை திறக்க இருப்பதாக ஸ்டாலின் அறிவித்துள்ளார். இதற்கும் ஆக்ஸ்போர்டு பல்கலைக்கும் எந்த சம்பந்தமும் இல்லை.’’

இவ்வாறு ஒருவர் சொன்னதாக தினமலர் செய்தி வெளி யிட்டுள்ளது.

‘உண்மையின் உரை கல்’ என்று தன்னுடைய பத்திரிகையை விளம்பரம் செய்யும் அந்தப் புரட்டு மலர், குறைந்தபட்சம் இந்தச் செய்தியைப் பதிப்பிக்கும்முன் இணையதளத்தில் தேடியிருக்கலாம். ஆனால், ‘உண்மை ஒரு முறை சுற்றி வருவதற்கு முன்னால் வதந்தி நூறு முறை சுற்றி வந்துவிடும் என்பதையே ‘தாரக மந்திரமாகக்’ கொண்டு செயல்பட்டு வரும் தினமலரும்,  இந்துத்துவ கும்பலின் ‘அய்.டி. விங்’குகளும் சமூக ஊடகத்திலும், பத்திரிகையிலும் பொய்யை, புரட்டைப் பரப்புவது என முடிவெடுத்து நேற்று (30.8.2025) முதலே இந்தப் பொய்ச் செய்தியைப் பரப்பி தந்தை பெரியாரையும், முதலமைச்சர் மு.க. ஸ்டாலின் அவர்களையும் இழிவு செய்ய வேண்டும் என நோக்கோடு செயல்பட்டு வருகின்றனர்.

உண்மை இதுதான்! இந்த சுயமரியாதை இயக்க நூற்றாண்டு மாநாடு ஆக்ஸ்ஃபோர்டு பல்கலைக் கழகத்தின்  செயின்ட் ஆண்டனி மற்றும் பெல்லியோல் கல்லூரி இணைந்து நடத்தும் நிகழ்வு ஆகும்.

இதுகுறித்து செயின்ட் ஆண்டனி கல்லூரியின் இணையதளத்திலும்,

ஆக்ஸ்ஃபோர்டு பல்கலைக் கழகத்தின் இணையதளத்திலும் விவரங்கள் வெளி யிடப்பட்டுள்ளன. (அவற்றின் இணைப்புச் சுட்டியும் படமும் இங்கே தரப்பட்டுள்ளது.)

ஆக்ஸ்போர்டு பல்கலைக் கழகத்தின் அதிகாரபூர்வ இணையதளத்தில் ஆக்ஸ்போர்டு டாக்ஸ் (OXford Talks) பகுதியில் இடம் பெற்றுள்ள இணைப்பக்கங்களில் நிகழ்வை ஒருங்கிணைப்பது St
Antony’s College, 62 Woodstock Road OX2 6JF என்பதும், அதன்  Asian Studies Centre துறை ஒருங்கிணைப்பதும், ஒருங்கிணைப்பாளர்கள் பெயர்கள் Jim Mallinson (University of
Oxford), Faisal Devji (St Antony’s College) என்பதும், துறையின் அலுவல் பூர்வ மின்னஞ்சல் முகவரி உள்ளிட்டனவும் கொடுக்கப்பட்டு, நிகழ்வில் பங்கேற்பதற்குப் பதிவு செய்ய இணைப்பும் கொடுக்கப்பட்டுள்ளது.  இதே போல் செப்.4 மாலை  தமிழ்நாடு முதலமைச்சர் பங்கேற்கும் நிகழ்ச்சிக்கான இணைப்பும், மறுநாள் நடக்கும் கருத்தரங்கு தொடர்ச்சிகான இணைப்பும் தனித்தனியே வழங்கப்பட்டுள்ளன.

அப்படியிருக்க திமுகவில் இருந்து  ஓடி போய் அண்மையில்  பாஜகவில் இணைந்த ‘இவர் தாவாத கட்சியில்லை தரணியிலே’ என்ற சிறப்புக்குரிய ஒருவரது புரளிப் பேச்சை செய்தியாக்கி வெளியிடுவதுதான் அவாளின் பத்திரிகா தர்மமா?

 - விடுதலை நாளேடு, 31.08.25

குமார சம்பவம்’ இல்லாத ‘குமார சம்பவம்’ !-செ.ர.பார்த்தசாரதி

‘குமார சம்பவம்’ இல்லாத ‘குமார சம்பவம்’ !-செ.ர.பார்த்தசாரதி

சைவ மதத்தின் பெருமையை கூறுவதோடு, அதன் கதாநாயகர்களான பார்வதி பரமசிவனின் திருமணக் காட்சி களையும், அவர்களின் மகனாக ஸ்கந்தன் (கந்தன் – முருகன்) பிறப்பதை பற்றியும் ‘குமார சம்பவம்’ என்ற காப்பியம் கூறுகிறது.

இந்த காப்பியத்தை காளியின் பக்தராக கூறப்படும், ‘கவிஞர் காளிதாசர்’ இயற்றியதாக கூறப்படுகிறது. (இவர் வாழ்ந்த காலம் பொ.மு 01 முதல் பொ.பி. 05 வரை ஏதோ ஒரு நூற்றாண்டாக இருக்கலாம் என கருதப்படுகிறது!

‘குமார சம்பவம்’ என்கிற இந்த காப்பியத்தில் 17 சருக்கங்கள் இருக்கின்றன. இதில் எட்டு சருக்கங்களை தான் ‘காளிதாசர்’ இயற்றிய தாகவும், மற்ற 9 சருக்கங்களை வேறு யாரோ எழுதி ‘இடை செருகல்’ செய்து விட்டதாகவும் கூறுகின்றனர்.

முதல் 8 எட்டு சருக்கங்களைத் தான் பலர் ‘குமார சம்பவம்’ என்ற பெயரில் வெளியிட்டுள்ளனர். சிலர் மட்டுமே 17 சருக்கங்களையும் வெளியிட்டுள்ளனர்.

தமிழ்நாட்டில் பக்தி நூல்களை வெளியிடும் ‘லிட்டில் பிளவர் பதிப்பகம்’ ‘குமார சம்பவம்’ என்ற பெயரில் 8 சருக்கங்கள் கொண்டதையே வெளியிட்டுள்ளது.

காப்பியத்தின் பெயர் ‘குமார சம்பவம்’, ஆனால் இந்த எட்டு சருக்கங்களில் குமார சம்பவத்தை பற்றியே குறிப்பிடப்படவில்லை!. அதாவது குமாரன் எனப்படும் ஸ்கந்தனின் பிறப்பு பற்றியே குறிப்பிடப்படவில்லை. குமாரனின் பிறப்பு பற்றி காவியம் எழுத வந்த காளிதாசர், குமாரனின் பிறப்பை பற்றி, கூறாமலா இருந்திருப்பார்?

பிறகு வரும் 9, 10, 11 ஆகிய சருக்கங்களில் தான் கந்தன் எனப்படும் குமாரன் எப்படி பிறந்தான் என்று வர்ணிக்கப்படுகிறது. இந்த வர்ணனை மிகவும் அருவருப்பாக (ஆபாசமாக) இருப்பதால் தான் இடைச்செருகல் என புறக்கணித்து விடுகின்றனர்.

‘குமார சம்பவம்’ என்கிற காப்பியத்தில் உள்ளபடி…..

பார்வதி – பரமசிவன் திருமணம் பருவதமலையில் நடைபெறுகிறது. அங்கே ஒரு மாதம் தங்கி இன்பம் அனுபவிக்கின்றனர். பிறகு இமய மலையின் உச்சிக்கு(கந்தமாதன மலை) புறப்பட்டு சென்று அங்கு யாரும் அறியா இடத்தில் மதுவை உண்டு, பாலின்ப களிப்பில், வாழ்க்கை வாழ்கின்றனர்.

இப்படியே நூறு தேவ ஆண்டுகள் உடலுறவில் ஈடுபட்டு வருகின்றனர்.(மனிதர்களின் ஒரு ஆண்டு என்பது தேவர்களின் ஒரு நாள். 360 மனித ஆண்டுகள் தேவர்களின் ஒரு ஆண்டு. அப்படியானால் 360×100 =36000 மனித ஆண்டுகள்) அதாவது 36,000 மனித ஆண்டுகள் பார்வதியும் -பரமசிவனும் உடலுறவில் ஈடுபட்டு வந்திருக்கின்றனர்.

ஆனாலும் பார்வதிக்கு ஒரு குழந்தையும் பிறக்கவில்லை. பிரம்மா உள்ளிட்ட தேவர்கள் கலங்கி போய், இனிமேல் ஒரு குழந்தை பிறந்தால் யாரால் தாங்க முடியும்? என அஞ்சிய தேவர்கள் ‘அக்னி’ தேவனை தூது அனுப்ப முடிவு செய்தனர். அக்னி தேவன் ‘புறா’ வடிவில், பார்வதியும் பரமசிவனும் உடலுறவு கொண்டிருக்கும் அறைக்குள் நுழைந்தான். துணுக்குற்ற சிவன் அப்படியே வெளியே வந்து அக்னி தேவனிடம் ‘என்ன அவசரம்?’ என்று கேட்டான். தேவர்களுக்கு தொல்லை கொடுத்து வரும் ‘தாரகாசுர’னை கொல்ல, ஒரு மகனை தாங்கள் பெற்றுத் தர வேண்டும்’ என தேவர்கள் என்னை அனுப்பி வைத்துள்ளனர்’ என கூறினார்.

சமாதானம் அடைந்த சிவன், “உடலுறவுக்கு இடையே என்னை தொந்தரவு செய்ததால் வெளியேறும் ஸ்கலிதத்தை (விந்துவை) நீ ஏந்தி கொள்” என அக்னி பகவானிடம் விட்டார்.

அக்னி பகவான் அதன் வெப்பத்தை தாளமாட்டாமல் கங்கை நதியின் ‘சரவணப் பொய்கை’யில் மூழ்கி அங்கேயே விட்டுவிட்டு வந்து விட்டான். அங்கே நீராட வந்த கார்த்திகை பெண்கள் ஆறு பேரும் அந்த விந்துவின் நீரினால் கர்ப்பமானார்கள். அந்த கர்ப்பத்தை அங்கேயே ஈன்று விட்டு விட்டனர்.

அதைப் பார்வதி எடுக்க ஆறு குழந்தைகளாக மாறின. அதை ஒன்றாக சேர்க்க ஆறு தலை 12 கை உடைய கந்தனாக (ஆறுமுகம் – ஷண்முகம்) மாறியது.

‘குமார சம்பவம்’; சருக்கம்: 9,10,11 பகுதிகள் தான் இவற்றை விவரிக்கின்றன.

ஸ்ரீமத் வால்மீகி இராமாயணம், பால காண்டம் சருக்கம் 36, 37இலும்,

ஸ்ரீ சிவ மஹா புராணம்,1 ஞான சம்ஹிதை,18. தாரகாசூரன் உதயமும் திரிபுரத் தோற்றமும்’ பகுதியிலும்  இதே கதை இடம்பெற்றுள்ளது.

‘குமார சம்பவம்’ என்ற பெயரில் காப்பியம் எழுத வந்தவர், குமாரனின் பிறப்பு பற்றி எழுதாமல் விட்டிருக்க வாய்ப்பில்லை. பிறகு வந்தவர்கள் காப்பியத்தை நகலெடுக்கும் போது அந்தந்த காலகட்டத்தில் இருந்த மொழி நடைக்கேற்றாற் போல் எழுதியிருப்பார்கள். அதை வைத்துக் கொண்டு “இந்தப் பகுதி இப்படி இருக்கிறது; அந்தப் பகுதி அப்படி இருக்கிறது’ அதனால் இந்த பகுதிகளை அவர் எழுதி இருக்க மாட்டார்” என்று சொல்வதெல்லாம் கட்டுக்கதையே!

- விடுதலை ஞாயிறு மலர், 20.09.2025

வாழ்க்கை வாழ்வதற்கே’ என்று முழங்கிய எபிகூரஸ்

- செ.ர.பார்த்தசாரதி

2360 ஆண்டுகளுக்கு முன்பாக (பொ.மு. 341) கிரேக்கத்தில் மத்தியதரைக் கடலில் உள்ள ‘சுவர்ல சாமோஸ்’ என்கிற சின்னஞ் சிறு தீவில் ‘பிளாட்டோ’ மறைந்து அய்ந்து ஆண்டுகள் கழித்து ‘அரிஸ்டாட்டில்’ காலத்தில் ‘எபிகூரஸ்’ பிறந்துள்ளார்.

இவரின் தந்தையார் பெயர் ‘நியோக்ளீஸ்ய (பள்ளி ஆசிரியர்), தாயார் பெயர் ‘காரஸ்ட்ராட்டா’ ஆகும்.

‘டெமோகிரேடர்ஸ்ய மற்றும் ‘பிளாட்டோ’வின் சீடர்களிடம் தத்துவம் பயின்றார்.

எபிகூரஸ் முதலாவதாக தத்துவப் பள்ளியை ‘மைட்டிலீன்’ மற்றும் ‘லாம் சக’சில் நிறுவினார்.

பின்னர் பொ.மு.306இல் ஏதன்சுக்கு சென்று சமூக நல்லிணக்கத்துடன் கூடிய தத்துவப் பயிற்சித் தோட்டத்தை உருவாக்கினார்.

அவரது தாயார் ‘மந்திரம் தந்திரம்’ என்ற பெயரில் நோய்களைத் தீர்க்கும்போது உடன் இருந்ததால், மந்திரம் என்பதெல்லாம் பொய் என்பதை புரிந்து கொண்டார்.

கடவுளுக்கும், மனிதனுக்கும் தொடர்பில்லை; கடவுள் அவர் வேலையை பார்த்துக் கொண்டிருக்கிறார், நம்மை பார்க்க அவருக்கு நேரமில்லை, நாம்தான் நம்மைப் பார்த்துக் கொள்ள வேண்டும் என்று கூறினார்.

கடவுளின் பேரால் நடப்பதாக சொல்லப்படுபவை அனைத்தும் இட்டுக்கட்டபட்டவைகளே!

கோள்கள், விண்மீன்களால் மனித வாழ்க்கையில் எந்த விளைவும் உண்டாகாது!

விதி என்றும், மறுபிறப்பு என்றும் எதுவும் கிடையாது!

இந்த வாழ்க்கையே உண்மை; இன்பமாக வாழ வேண்டும்; எளிமையாக வாழ வேண்டும்; தேவையான அளவே உண்ண வேண்டும்; மது அருந்துவது கூடாது, மிதமிஞ்சிய கேளிக்கை கூடாது. இன்பமாக இருந்தால் உடலும் இன்பமாக (நலமாக) இருக்கும்! என அறிவுரைகளை கூறியுள்ளார்.

ஆனால், எதிரிகள் அவரின் கருத்துகளை வேண்டுமென்றே திரித்து வந்துள்ளனர். எபிகூரஸ் சிந்தனைகளை பின்பற்றுபவர்களை ‘எபிகூரியன்’ (Epicurean) என்று அழைப்பார்கள். ஆனால், ஆங்கிலத்தில் ‘எபிகூரியன்’ என்ற சொல்லை அற்ப ஆசைகளை நெஞ்சில் சுமந்து கொண்டிருப்பவர்கள், பெருந்தீனிக் காரர்கள், ஆடம்பரகாரர்கள், கேளிக்கைகளில் திளைப்பவர்கள் என்ற பொருளில் பயன்படுத்துகிறார்கள்.

‘இந்த உலகமும், கோள்களும், விண்மீன்களும், பேரண்டமும், அணுக் களாலும், அணுக்களின் திரட்சியாளுமே உண்டாகியுள்ளது’ என்கிறார்.

நாம் காணும் பொருள்களும், உயிரினங்களும், ஏன் மனிதனும் கூட அணுக்களின் கூட்டணியினால் உண்டானது என்கிறார்.

பேரண்டம் முழுக்க கண்ணுக்கு தெரியாத அணுக்களால் நிரப்பப் பட்டுள்ளது.

அனைத்து பொருள்களும் இயங்கிக் கொண்டுள்ளது. பொருள்களுக்குள் உள்ள அணுக்கள் ஒரு வரையறைக்குள் இயங்குகின்றன.

எந்தப் பொருளும் தடை இல்லாதவரை இயங்கிக் கொண்டே இருக்கும். அப்படியே தடை உண்டானாலும் மறு திசையில் பயணிக்கும்.

அணுக்கள் சிதைந்தாலும் வேறு வடிவத்தில் தோன்றும், இல்லாததிலிருந்து எதுவும் தோன்றாது.

நம் புவியைப் போல் வேறு புவிகளும் இருக்கக்கூடும், அதில் இங்குள்ள உயிரினங்கள் போலவோ அல்லது வேறு வகையில் கூட இருக்கலாம்.

இப்படி பல கொள்கைகளை எந்தக் கருவிகளும் இல்லாத நிலையில் ஆய்ந்துணர்ந்து கூறியுள்ளார்.

தனியாக பயிற்சி கூடம் அமைத்து இக் கொள்கைகளை பயிற்றுவித்து வந்தார்.

இந்தப் பயிற்சிக் கூடத்தில் கல்வி மறுக்கப்பட்ட பெண் இனத்தையும் சேர்த்துக் கொண்டு பயிற்றுவித்தார்.

இங்கு பயிற்சி பெற்று சென்றவர்கள் பல பகுதிகளுக்கும் சென்று அவரின் கொள்கைகளை பரப்பினர். பல நாடுகளிலும் அவரின் தத்துவங்களை பின்பற்றினர். கிறிஸ்தவ மதம் தோன்றிய பின் எபிகூரஸின் தத்துவங்கள் மறைக்கப்பட்டன, அழிக்கப்பட்டன.

எபிகூரஸ் 37 ஆய்வு நூல்களை எழுதி இருந்தாலும் அவைகள் நமக்கு கிடைக்கப்பெறவில்லை. 300க்கு மேற்பட்ட ஆய்வுக் கட்டுரைகளையும் எழுதியுள்ளதாக தெரியவருகிறது.

எதிரிகளின் கருத்துக்களில் இருந்தும், நூல்களில் இருந்தும் அவரைப் பற்றிய விமர்சனங்களாலும், அவரின் கருத்துக்களை அறிய முடிகிறது.

பொ.பி. மூன்றாம் நூற்றாண்டில் வாழ்ந்த ‘டியோஜெனிஸ் லார்டியஸ்’ என்பவர் எழுதிய நூலில், எபிகூரஸ் தனது மூன்று சீடர்களுக்கு எழுதிய கடிதம் இடம்பெற்றுள்ளது.

‘ஹெரோடோட்டஸ்’க்கு எழுதிய கடிதம் மூலம் ‘மீவியற்பியல்'(metaphysics) அதாவது “இருப்பு பொருளியல்’ பற்றிய சுருக்க கருத்து தெரிய வருகிறது.

‘பைத்தோக்கிள்சு’க்கு எழுதிய கடிதம் மூலம் ‘வானிலை நிகழ்வுகளுக்கான அணு விளக்கம்’ தெரிய வருகிறது.

‘மெனோசியஸு’க்கு எழுதிய கடிதம் மூலம் எபிகூரசின் நெறிமுறைகள் சுருக்கமாக தெரிய வருகிறது.

கடவுள் என்று ஒன்று இல்லை என்பதற்கான ஆய்வு முடிவு கருத்துகளை கூறிய எபிகூரஸ், “கடவுளுக்கும் மனிதனுக்கும் தொடர்பில்லை; கடவுள் அவர் வேலையை பார்த்துக் கொண்டிருக்கிறார், நம்மை பார்க்க அவருக்கு நேரமில்லை. நாம் தான் நம்மை பார்த்துக் கொள்ள வேண்டும்” என்ற கருத்தையும் முன் வைக்கிறார்.

கடவுள் மறுப்பு தத்துவத்தை நேரடியாக முன் வைத்தால் உயிருக்கு ஆபத்து வரும் என்ற நிலை இருந்ததால், ‘பயனற்ற கடவுள்’ என்று கூறி ‘பாதுகாப்பு தேடிக்கொண்டார்’ என்றுதான் தோன்றுகிறது.

தனது 72ஆவது வயதில் (பொ.மு. 270) முதுமையாலும் சிறுநீரக கல் நோயாலும் எபிகூரஸ் மறைவுற்றார்.

தந்தை பெரியாரின் ‘மெட்டீரியலிசம் அல்லது பிருகிருதிவாதம்’ என்ற நூலின் ஒரு பகுதியில் எபிகூரஸ்யின் ‘மீவியற்பியல்’ (metaphysics) கருத்துகள் பல இடம் பெற்றுள்ளன.

- விடுதலை ஞாயிறு மலர், 30.08.2025

 

பா.சிவக்குமார் – பா.சவுமியலலிதா இணையேற்பு நிகழ்வு- 28.1.2007

‘விடுதலை’ ஒளிப்படக் கலைஞரும், நம் சுற்றுப்பயண உதவியாளருமான துறையூரைச் சார்ந்த எல்.என்.பாலசுந்தரம், பா. ராஜம்மாள் ஆகியோரின் செல்வன் பா.சிவக்குமார் அவர்களுக்கும், கோவை புதூரைச் சார்ந்த பொறியாளர் ஆர்.கே.பாலமுருகேசன், பா.பத்மாசினி ஆகியோரின் செல்வி பா.சவுமியலலிதா அவர்களுக்கும் வாழ்க்கை இணை ஏற்பு விழா சென்னை – பெரியார் திடலில் 28.1.2007 அன்று மாலை 6 மணிக்கு எமது தலைமையில் மிகச் சிறப்பாக நடை பெற்றது.

நிகழ்ச்சிக்கு வந்திருந்த அனைவரையும் பெரியார் சுயமரியாதைத் திருமண நிலைய இயக்குநர் திருமகள் இறையன் வரவேற்றுப் பேசினார். திராவிடர் கழகப் பொதுச் செயலாளர் கவிஞர் கலி.பூங்குன்றன் முன்னிலை வகித்துப் பேசினார். மணமக்களை வாழ்த்தி தமிழ்நாடு சட்டப் பேரவைச் செயலாளர் மா.செல்வராஜ், நீதிபதிகள் சங்கப் பொதுச் செயலாளர் நீதிபதி பரஞ்சோதி, கழகப் பிரச்சாரச் செயலாளர் வழக்குரைஞர் அ.அருள்மொழி, அகில இந்திய மருத்துவ தேர்வாணையக் குழுத் தலைவர் டாக்டர் அ.ராஜசேகரன், கழகப் பொதுச்செயலாளர் சு.அறிவுக்கரசு கழகப் பொருளாளர் வழக்குரைஞர் கோ. சாமிதுரை ஆகியோர் உரையாற்றினர்.

நாம் நம் உரையில், “விடுதலை குடும்பத்தில் நடக்கக்கூடிய மணவிழா இந்த மணவிழா. சிவக்குமார் எங்களுடைய பிள்ளைகளில் ஒருவர். குடும்பத்து உறுப்பினர். அதுவும் போற்றத்தக்க குறை சொல்ல முடியாத பிள்ளைகளில் ஒருவர் என்ற பெருமைக்குரியவர்.  என் நண்பர்கள் சொன்னது போல் மாநிலம் தழுவியளவில் சிவக்குமார் அறிமுகமானவர் காரணம், எல்லோருடைய முகமும் இவருடைய கைப்பிடிக்குள் இருக்கிறது; அதாவது அவருடைய ஒளிப்படக் கருவிக்குள்ளே இருக்கிறது.

என்னுடைய உதவியாளர்கள் என்று சொல்லக்கூடிய தோழர்கள் கடும் பத்தியத்திற்கு ஆட்பட்டவர்கள். ஒரு உலைக்களத்திலே எப்படி இரும்பு காய்ச்சி அடிக்கப்படுகிறதோ அதைப் போல அவர்கள் கடும் பத்தியமாக இருந்தாலும் அவர்கள் உயிர் அனையவராவார்கள் என்று சொல்லக்கூடிய அளவிற்கு எந்த நிலையிலும், எப்படிப்பட்ட சூழ்நிலையிலும் எங்களை விட்டுப் போக மாட்டார்கள் என்று சொல்லக்கூடிய அந்த மனதைப் பெற்று இருக்கிறவை நம்முடைய குடும்பங்கள். எனவே, தந்தை பெரியார் அவர்களுடைய அறிவார்ந்த கொள்கைகள் எங்களை ஒன்று படுத்தி இருக்கிறது. இத்தனை ஆண்டுகள் சிவக்குமார் பழக்கம். எங்கள் குடும்பத்துப் பிள்ளைகளிலே ஒருவர். அப்படித்தான் கருதி இருக்கிறோம் என்றால் இன்னமும் சிவக்குமார் என்ன ஜாதி என்று எங்களுக்குத் தெரியாது தெரிய வேண்டிய அவசியம் இல்லை. இதுதான் பெரியார் அவர்களால் உருவாக்கப்பட்ட மானுட சமுதாயப் பற்றின் வெளிப்பாடு.

சுயமரியாதைத் திருமண நிலையத்தின் மூலமாக பலவகையான மண வாழ்க்கைத் உருவாக்கி வருகிறார்கள்.  ஒரு நல்ல புது வாழ்விணையை திருமகள் இறையன் அவர்கள் உருவாக்கி இருக்கிறார். இந்த அமைப்பின் மூலம் பல மணவிழாக்கள் வெற்றிகரமாக நடத்திக்காட்டி நல்ல அளவிற்கு வளர்ந்து கொண்டிருக்கிறார்கள். எனவே, இந்த மணமக்களுக்கு அதிக அறிவுரை சொல்ல வேண்டிய அவசியம் இல்லை. சீனத்தில் மா-சே-துங் 1949 இல் திருமணம் முறையில் ஒரு புரட்சி செய்தார். ஆனால் தந்தை பெரியார் உருவாக்கிய சுயமரியாதைத் திருமணப் புரட்சி என்பது 1928லேயே தொடங்கிவிட்டது. ” என்று உரையாற்றினேன்.

பா.சிவக்குமார் – பா.சவுமியலலிதா இணையேற்பு நிகழ்வு

2025அய்யாவின் அடிச்சுவட்டில்ஏப்ரல் 16-30 359ஆவது கட்டுரையின் ஒரு பகுதி...

உண்மை இதழ் மாதமிருமுறை

சூத்திரன் குடிக்கத் தடை செய்யப்பட்ட மாட்டுப் பால்! -செ.ர.பார்த்தசாரதி

வைணவ மதத்தை பரப்பிய பன்னிரண்டு ஆழ்வார்களில் ஒருவரான நாதமுனி ஆழ்வார் அவர்களின், ‘விஷிஷ்டாத்வைதம்’ என்ற கொள்கைக்கு வேத முறைப்படி விளக்க உரை கூறிய ‘இராமானுஜர்’, ‘நாலாயிர திவ்ய பிரபந்தம்’ என்று தமிழில் எழுதப்பட்ட வேத நூலை அடிப்படையாகக் கொண்டு வைணவ மதத்தை பொ.பி.10ஆம் நூற்றாண்டில் பரப்பினார்.

அவர் வழியில் பிறகு வந்த திருவரங்கத்தை சேர்ந்த ‘மணவாள மாமுனி’ என்பவர் (பொ.பி.14ஆம் நூற்றாண்டு) தற்போது பின்பற்றப்படும் ‘தென்கலை’ பிரிவை தோற்று வித்தார். அதே ‘இராமானுஜர் வழியில் வந்த, காஞ்சிபுரத்தை சேர்ந்த ‘வேதாந்த தேசிகர்’ என்பவர் (பொ.பி.13-14ஆம் நூற்றாண்டு) சமஸ்கிருத ‘நால் வேத’த்தை தான் அடிப்படையாக கொள்ள வேண்டும்’ என்று வைணவ மதத்தில் ஒரு பிரிவை ஏற்படுத்தினார். இதனால் அவர் ஏற்படுத்திய பிரிவுக்கு ‘வடகலை’ என்றும் கூறப்படுகிறது.

தமிழ் நூலான ‘நாலாயிரத் திவ்ய பிரபந்தத்’தைப் பரிந்துரைத்த இராமானுஜர் எழுதிய நூல்கள் அனைத்தும், சமஸ்கிருத நூல்களே! ஆனால், சமஸ்கிருத வேதத்தை பரிந்துரைத்த ‘வேதாந்த தேசிகர்’ பல தமிழ் நூல்களை இயற்றியிருக்கிறார்.

அதில் ஒன்று ‘தேசிகப் பிரபந்தம்’ என்ற வைணவ மத விளக்க நூலாகும்.

அந்த ‘தேசிக பிரபந்த’த்தில் ஒரு பகுதியாக ‘ஆகார நியமம்’ என்கின்ற பகுதி உள்ளது. அதில் எந்தெந்த உணவை உண்ணலாம், எப்போது உண்ணலாம், யார் யார் உண்ணலாம் என பட்டியல் போடப்பட்டுள்ளது.

அதில் உள்ள ஒரு பாடல் வருமாறு:

“சாதி குணம் ஆசிரமந் தேசங் காலம்

தர்மங்கள் நிமித்தங்கள் முதலாவோதும்

பேத முதலாக வொரு திரவியந் தான்

பிரிந்து நவந்தீங்கினையும் பெற்று நிற்கும்

பாதமிசைப் பிறந்தோர்க்குக் கபிலையின் பால்

பருகிடலாகா தென்று மறையோர் சொன்னார்.’’

– ஸ்ரீ தேசிகப் பிரபந்தம், ஆகார நியமம் – பாடல் 20

மனிதர்கள் எல்லோருக்கும், ஒரே வகையில் வேதத்தில் நீதி வகுக்கப்படவில்லை; ஜாதி குணத்திற்கு ஏற்றார் போல் நீதி வகுக்கப்பட்டுள்ளது; ‘ஒரு ஜாதிக்கு உகந்த உணவு வேறொரு சாதிக்கு ஆகாத உணவாகும். பார்ப்பனர்கள் மட்டுமே குடிக்க வேண்டிய ‘காராம்’ (கபிலை) பசுவின் பாலைக் கடவுளின் கால் பகுதியிலிருந்து பிறந்த சூத்திரர்கள் குடிக்கக்கூடாது; குடித்தால் நரகத்தை அடைவார்’ என்று ‘மறையோர்’ சொன்னதாக அதாவது ‘ஸ்மிருதிகள்’ சொன்னதாக இப்பாடல் வழியாக ‘வேதாந்த தேசிகர்’ கூறுகிறார்.

பார்ப்பனர்கள் மனிதர்களில் மட்டும் ஜாதி பிரிக்கவில்லை தனக்கு நெருக்கமான பல உயிரினங்களிலும் ஜாதிகளைப் பிரித்து வைத்துள்ளனர்.

கருப்பாக இருக்கும் உயிரினங்களைப் ‘பறை’ என்ற அடைமொழியாலும் மற்ற நிறங்களில் இருப்பவைகளைப் ‘பிராமண’ என்ற அடைமொழியாலும் அழைக்கின்றனர்.

வடமாநிலங்களில் ‘பிராமணப் பசு’ என்றும் ‘சூத்திரப் பசு’ என்றும் பிரித்து வைத்துள்ளனர்.

பொதுவாக பசுக்கள் கருப்பு, சிவப்பு, வெள்ளை போன்ற மூன்று வகையான நிறங்களைக் கொண்டவை.

‘காராம் பசு’ என்பது உடல் முழுவதும் கருமை நிறத்தை உடையதாகும். இவற்றிற்கு காரணம் சில மரபணு (ஜீன்) வகைகளாகும்.

‘காராம் பசு’வின் பால் சிறிது அடர்த்தியாக இருக்கும். அதற்கு ஏற்றால் போல் கூடுதல் சுவை இருக்கும்.

கருப்பாக இருப்பதனாலேயே எருமையை புறக்கணிக்கும் பார்ப்பனர்கள், ‘காராம் பசு’ கருப்பாக இருந்தாலும் அதன் பயன் கருதி மற்றவர்களைக் குடிக்கக் கூடாது என்று சொல்லிவிட்டுத் தாங்களே குடிப்பதற்காக, “வேதம் கூறுகிறது” என்று ஜாதி அடிப்படையில் சதித் திட்டம் வகுத்து வைத்தனர் என்பது இதனால் புலனாகின்றது.

- செ.ர.பார்த்தசாரதி

- விடுதலை ஞாயிறு மலர்,        09.08.2025